“Achieving gender equality and empowering women and girls is the unfinished business of our time, and the greatest human rights challenge in our world.” UN Secretary General António Guterres
Riba proposishon di Nashonann Uní tur aña di nobo riba 8 di mart tin aktividatnan rònt mundu den kuadro di Dia Internashonal di Hende Muhé. Riba e dia aki ta pone atenshon spesial na e hende muhé i temanan relevante pa e hende muhé. Tantu lokal, regional i internashonal ta pone atenshon na temanan manera diskriminashon, violensia kontra di hende muhé, oportunidatnan laboral i ekonómiko pa e hende muhé sali dilanti.
Na Kòrsou, den kuadro di Dia Internashonal di Hende Muhé, Parlamentarionan di frakshon di MAN, señora Elsa Rozendal i señora Gisèlle Mac William, a organisá un enkuentro ku un grupo di hende muhé pa reflehá i selebrá e dia importante aki.
Ámbos Parlamentario tabata amfitrion pa un grupo di hende muhé ku tabata konsistí di ámbos miembronan femenino prominente di partido MAN i tambe profeshonalnan riba diferente area pa ku bienestar di e hende muhé manera derechinan di hende muhé, igualdat i hustisia sosial.
Durante e desayuno, a toka vários tema i a interkambiá prinsipalmente riba e forsa di e hende muhé den nos komunidat.
Banda di e interkambio i diferente opinionnan di gran balor ku a bini dilanti, e desayuno tabata un instrumento pa hende muhénan bini huntu i sosialisá un ratu ku otro. Meta prinsipal tabata pa reflehá kon ta sigui garantisá progreso di tur hende muhé na Kòrsou.
