Despues di dos aña di ausencia, Aruba ta bay celebra Carnaval bek, cual lo bira Carnaval 69. Parad’i Flambeu lo ta dia 7 di januari 2023. Stichting Maneho di Aruba su Carnaval (SMAC) e aña aki, a bin cu algun cambio.
CAMBIO
Un di e cambionan aki ta encera, cu ta tira lot p’e Parad’i Flambeu 2023, prome cu cambio di aña y esey ta loke a tuma luga diahuebs, 29 di december. Darren van Ommeren, presidente di SMAC, durante un anochi agradabel a trek lot pa loke ta e secuencia di Parad’i Flambeu. E aña aki a bin c’un idea, cada lider di grupo mester a bay rib’e ruta pa busca e blaasnan, pa trece nan bek pa plasa. Kibramento di blaas a bay den un ambiente di fin di aña carnavalesco.
E secuencia ta como lo siguiente:
1. Empire Carnival Group
2. T.O.B
3. Infinity
4. Royal Carnival Group
5. Los Laga Bay
6. Champagne Carnival Group
Tin un total di 6 grupo cu a inscribi pa esaki y e ta cuminsa pa 8:00pm en punto. Grupo cu no ta na ora, automaticamente lo bira e ultimo grupo. Esaki hunto cu e stakeholdernan, hunto cu KPA a coordina. Ta haci yamada na tur lider di grupo, pa asina cu informa cada grupo e ora cu nan mester cuminsa stel op y na unda nan mester stel op, pa percura pa nan ta na tempo. Asina e fluho pa drenta e parada ta bay mas lihe.
Na final, presidente di SMAC, Darren van Ommeren a indica cu e gruponan no tin limite di participante. E gruponan mester di e participantenan, e Parad’i Flambeu lo sirbi di un manera of otro, di recaudacion di fondo pa asina nan por sigui participa. A caba di sali for di un pandemia y sigur, ta na cada un di nos pa engrandece nos Carnaval.
