Director di DOW, Marlon Croes, ta bisa di no tin ningun problema pa landa unda DOW ta laga awa di Bubaliplas drenta lama. Nos ta aplaudi e curashi cu e tin pa bula den e awa bruin cu ta scuma y hole pupu. Nos ta admira su fe den e midimento di DVG cu a mustra cu e awa ta cumpli cu normanan internacional. Señor Marlon ta admiti cu e midimento di DVG ta mustra completamente contradictorio cu locual rapport di CARMABI ta bisa. Pero segun Marlon esaki tin un splicashon simpel: CARMABI a midi unda e RWZI ta loos e awa den Bubaliplas mientras cu DVG ta midi na unda DOW ta loos e awa den lama. Segun Marlon berdad e awa ta drenta 60% contamina den Bubaliplas, pero den e plas tin procesonan natural ta tuma luga cu ta purifica e awa. P’esey tin borchi na Bubaliplas, cu ta adverti pa no drenta e awa contamina, pero no tin borchi na e beach na unda nan ta loos e awa den lama.
Na prome bista e ponencia ta zona bon. Pero, si bo para scucha e resto di Marlon su storia esaki no ta make ningun sense. Na prome luga Marlon a confirma cu e water hiacinten ta tapa 90% di e wateroppervlakte di Bubaliplas. Ora e bisa algo asina bo mester para y pensa kico esey ta nifica. Esey ta nifica cu luz di solo no por penetra e awa di Bubaliplas. Si no tin luz, no por tin fotosynthese. Sin fotosynthese, no tin oxigeno den e awa y sin oxigeno e microorganismonan no por breek af e material fecal (pupu) cu RWZI a dump den e plas. Esey ta nifica cu Bubaliplas ta un Kool-Aid di awa fecal cu RWZI ta dump den e plas hunto cu awasero.
Siguientemente e no ta make ningun sense pa bay gasta seis siman di trabao y placa pa bay kita waterhyacinthnan for di Bubaliplas si e procesonan natural na Bubaliplas ta trahando manera debe de ser. Waste of money and waste of time. Tampoco e plan di Minister Arends pa redirect e awa di Bubaliplas pa otro destino cu no ta lama, no ta haci ningun sentido si e awa ta perfectamente limpi. Pero e misterio di mas grandi di e episodio aki di Scooby Doo and the Pile of Poo, ta dicon coral y pisca ta muriendo den e awanan di Aruba si e awa ta limpi limpi?
Pa soluciona e misterio aki ta bon pa cuminsa na señala e red herring cu tanto Marlon Croes di DOW como Gisbert Boekhoudt di DNM (Directie Natuur en Milieu) ta lansa pa crea un escape route pa Gabinete Wever-Croes: nan ta tira culpa riba tur Gabinete cu nunca lo a duna e plantanan di RWZI nan debido atencion. Cu Gobierno mester tin mas atencion pa mantencion ta berdad, pero alabes e ta un red herring pa despista bo for di e hecho cu na 2018 TNO a bisa cu e awa di e RWZI ta drenta 60% contamina den Bubaliplas, locual ta un peliger pa bida marino y turismo. E siguiente aña CARMABI a añadi e advertencia cu e awa di riool cu ta drenta via Bubaliplas den lama ademas ta un peliger pa hende. Tambe CARMABI a mustra cu e coralnan y piscanan ta muri pa motibo di e calidad deplorabel di e awa (pagina 37 CARMABI). Esaki ta meymey di gobernacion di señora Evelyn Wever-Croes. P’esey no ta na su luga pa culpa ni Henny Eman, ni Nel Oduber, ni Mike Eman pa e falta di urgencia cu señora Evelyn Wever-Croes a duna na salud publico. Hecho ta cu salud di hende no tabata ningun prioridad. Dia 24 di november 2021 Minister Ursell Arends hunto cu Gisbert Boekhoudt a duna un conferencia di prensa na unda bo ta mira claramente cu e preocupacion pa cu salud di hende ta bin na di seis luga (https://fb.watch/aFuBV8Px4g/ minuut 22:55). Awo ta pretende otro. E realidad ta cu e live broadcast di 24ora.com y e inteview cu mi persona riba diabierna 14 di januari 2022 (https://fb.watch/aBIu3Y5xPH/ en https://fb.watch/aBIAFmzjl3/) a forsa Gobierno duna atencion na salud di hende. E motibo ta simpel: ora Dilma Arends of Sharina Henriquez ta skirbi na manera factual ningun Minister ta lesa e articulo. Manera cu nan ta wak drolnan di pupu ta landa na Eagle Beach nos tin tur nan atencion.
Ta p’esey e unico cos cu ta rest’ami ta pa puntra Ursell, Dangui y señora Evelyn si nan ta dispuesto pa bisti nan zwembroek y bikini pa bay bula hunto cu Hankey the Pile of Poo den e awa cu bo a mira riba imagennan di 24ora.com. Henter prensa lo t’ey pa transmiti e hazaña live. Happy swimming!
