Recientemente, coleganan di Santa Rosa a sorprende dos trahador, cu un merdia hopi ameno, dedica specialmente pa nan. E prome colega, ta Sr. Kenneth Samson, cu pa e clientenan di Santa Rosa, e ta e cara alegre cu semper a atende na caha y semper cla pa duna información y conseho.
Durante e ultimo 23 ana, ela eherce e función di Cahero pero semper cla pa coopera unda cu e tabata por y cu un sonrisa alegre y cu un actitud positivo den tur situacion. E otro colega ta Sr. Dolfi Rodgers, kende a fungi como Truck Driver pa e ultimo 6 ana y semper un persona alegre y hopi dedica na su trabou.
Durante un almuerzo ameno den e lobby di e kantoor di Santa Rosa Aruba, coleganan a bini hunto pa rindi homenahe na e dos empleadonan aki, cu a sa di brinda un aporte positivo tanto na Santa Rosa como na Aruba su Sector Primario. Durante e celebración, Sra. Nathalie Maduro, Directora pa e Departamento, a gradici ambos colega pa tur nan ana nan di servicio na e comunidad di Aruba y a felicita nan den nomber di Gobierno y especialmente di parti di Minister Chris Romero, kende no por tabata presente, pero mediante su representante di bureau, a manda felicita ambos empleado pa e bon trabou cu nan tabata sa di eherce durante nan trayectoria na e Departamento.
E coleganan a sorprende tanto Sr. Samson como Sr. Rodgers cu un bunita regalo como recuerdo di nan temporada cu nan a labora na Santa Rosa y hopi anectodas a wordo comparti cual a trece hopi sonrisa. Ambos a gradici e coleganan pa e bunita gesto y atención, brinda na nan y a keda sumamente contento cu a recuerdo cu e coleganan a regala nan. Ambos a primiti cu awor cu nan tin e tempo, nan lo bay planta pa nan mes y asina sigi comparti e conocemento cu nan a logra ricibi, mediante e temporada trahando na e Departamento di Agricultura, Cria y Pesca – Santa Rosa.
