Nos patrono San Francisco ta un inspiracion pa nos tempo moderno. E nomber berdadero di Francisco tawata Giovanni. Francisco ta e nomber di cariño cu e’l a haya, pasobra e tawata biaha hopi cu su tata pa Francia.
E hoben rico aki tawata pasa su bida gozando y festehando cu su amigonan di su mesun clase social. Pero Dios tabatin algo grandi warda p’ele. Francisco a kere cu e mester a lucha y gana bataya, pero Señor Dios a destin’e pa e restaura su Iglesia. Francisco no a comprende su mision berdadero, el a kere cu ta un misa e mester a traha. Francisco a laga tur cos di mundo para un banda y a entrega su mes completamente na servicio di Dios y su prohimo. E tawata cana rond proclamando bon noticia. E tawata duna speransa atrobe na esnan den scuridad di pobresa y enfermedad.
El a soporta hopi. Hasta su mayornan no a comprende’le, su amigonan tawata haci burla di dje y nan a bisa cu el a bira loco. Pero su locura tawata pa sirbi Dios y su prohimo cu alma y curpa. El a biba den plenitud e Evangelio di Cristo. Señor a yam’e den un manera particular y el a responde generosamente y a cumpli cu mandato di Señor. El a bira pober hunto cu e pobernan, pero rico den Spirito. Su bida a inspira hopi hoben di su tempo. Nan tambe a laga tur cos atras y hunto cu Francisco nan a dedica nan bida na Dios Cristo y su Iglesia.
Pastoor Stanislaw ta invita rumannan pa acudi na nobena di San Francisco di Asis, esaki ta cuminsa diamars 25 di septmeber, na Pro-Catedral San Francisco pa 6:00 P.M. Laga San Francisco ta bo Consuelo awor y semper.
