Sindicato Aduana di Aruba (SADA) no ta mucho contento cu e procedura di tanto Departamento di Recurso Humano como Gobierno pa loke ta trata e caso den Corte di un colega di nan. Ainda por corda cu no mucho tempo pasa, den un conferencia di prensa, presidente Edward Maduro, a indica cu e colega aki a haya un nombramento “onterecht”, esta inhusto. Sin un educacion academico, a manda un decreto gubernamental aden cu ta promove pa e bira un inspector di Invoerrechten en Accijnzen.
Durante un conferencia di prensa cu a tuma luga diamars mainta, SADA a pone tur cos riba mesa y a mustra cu no solamente cosnan a bay robes di parti di e director di Duana, Ricky Croes, pero sigur cos no a bay mucho bon tampoco cu e directora di Departamento di Recurso Humano, Omayra Lares, unda cu e ta haci su mes culpabel di actonan cu nan ta categorisa cu no ta integro.
Tambe Maduro a menciona cu di parti di gobierno, tanto Prome Minister como e Minister di Finansas no ta mustrando interes of atencion manera cu Cuerpo di Duana ta desea di nan.
Segun Edward Maduro, presidente di SADA a menciona cu nan colega Pablo a gana su caso den Corte. Un caso cu tabata basa riba mentira cu e director Ricky Croes a hinca den un proposicion cu a wordo manda na 2017 caba pa Minister di e tempo ey Angel Bermudez, p’asina nombra Pablo como inspector, “sabiendo cu e persona aki no tin un diploma academico, cual ta un di e rekisitonan pa dicho funcion.”
E siguiente paso den e procedura ta cu Minister Bermudez a manda e proposicion pa DRH dia 27 di juni, 2017, pidiendo conseho. Aki por bisa cu Lares, rond di augustus mas of menos 2017 ta informa SADA di dicho proposicion haya di e director.
A puntr’e riba su opinion y el a bisa cu e persona no por haya e nombramento ey, pasobra e falta estudio academico pa esaki, cu ta un di e condicionnan mas pisa pa e puesto di Inspector di Duana.
For di 2017, henter 2018 no a tende nada mas di e tema. SADA a kere cu e asunto a keda regla. Pero pa nan sorpresa, na februari 2019, despues di un aña y mey cu Lares a menciona dicho decision di Duana, a tende cu e landsbesluit di e nombramento aki a sali.
SADA na su turno, tin cu bisa cu a puntra Lares riba esaki ora cu a tende di dicho nombramento y el a indica cu e no sa di esaki y cu lo bay haci un investigacion pa wak kico por a bay robes.
Sinembargo, pa sorpresa di SADA, nan a ricibi den nan postbus documentonan cu ta mustra cu henter e asunto aki ta otro. Segun Maduro, ora cu bo ta traha a base di integridad y ta traha na bienestar di e cuerpo y cu hendenan ta wak bo ta traha asina, bo ta cuminsa haya documentonan ta cay den bo postbus.
Documentonan a divulga cu Lares si tabata na altura di dicho proposicion (voordracht), cu a sali na april di 2018 y cu ta Lares mes a firma dicho “voordracht” pa Conseho di Minister. Esaki sigur ta falta di integridad, apesar cu e mes a bisa cu no por nombra dicho persona debi na falta di estudio academico.
Mientras tanto henter 2018 no a tende nada y tur cos a sosode tras di cortina y scondi. Ora cu ta traha den aparato di gobierno cu tur hende ta papia di integridad, nan ta apunta DRH, Omayra Lares como un di esnan pa dirigi e Bureau di Integridad, anto ta haya tipo di atrocidadnan aki ta pasa den un aparato gubernamental, unda cu esnan cu mester duna ehempel, esnan cu mester ta esnan cu mester cana e liña straight, no sa di esaki ora cu ta trata di e chikitonan.
“Sigur ta trata aki di un onderonsje entre directornan y cu aparentemente gobierno su bendicion. Gobierno tambe ta duna indicacion, cu nan tambe ta parti di e onderonsje aki, cual sigur e sindicato ta lamenta profundamente,” Maduro a bisa.
E nombramento aki, el a sigui bisa, ta contra di tur fatsoen y integridad. Loke e ta lamenta mas ta cu Prome Minister ta na altura di esaki, kende na prome instante no a acepta y aproba e acto aki den su totalidad pasobra ta logico cu e tambe como hurista sa cu pa bo haya tipo di nombramentonan asina, no ta ken cu ta bo ta haya e diploma academico den un tienda cumpra, pero tin cu sacrifica varios aña di estudio pa por logra un diploma asina.
Tin cu bisa cu despues di a haya e landsbesluit unda ta nombra sr. Pablo den e rango di inspector, SADA a bin compronde cu di parti di Duana, esnan cu ta traha den e parti di PNO, cu nan tambe lo a informa DRH cu e landsbesluit aki no ta cuadra cu regla y ley.
Aki tin cu bisa di parti di SADA, a puntra kico ta bay tuma luga y a bin compronde cu di repente sra. Lares a realisa cu locual tabata tin scondi a cuminsa sali na cla.
Ora cu DRH y director Croes di Duana a ripara cu SADA a cuminsa haya sa e berdad kico ta pasando pa loke ta trata e nombramento inhusto aki, di repente sra. Lares ta manda informa cu un carta pa Minister di Finansas a bay aden pa trek in e nombramento.
Den e voordracht cu Lares a firma y manda pa Conseho di Minister, e ta indica cu sr. Pablo ta den posesion di e opleiding aki. Den e carta ta para cu e opleiding cu mester tin pa e rango di inspector aki ta cumpli cun’e. A mal informa Conseho di Minister cu sr. Pablo tin dicho estudio. Aki tin un mentira den e carta di sra. Lares, cu e meta pa pasa dicho landsbesluit contra tur regla.
E asunto aki ta algo hopi serio y cuestionabel y SADA a pidi pa haci un investigacion di biaha.
Aki por mira cu un sin fin di gañamento, un sin fin di trocemento di berdad a bin ta tuma luga. Di parti di prome minister y minister di finansas, cu ta papia di integridad, no tabata tende nada.
Despues di e sentencia dicta den corte, cu dos hurista cu ta forma parti di e management team, cu si tin e opleiding academico aki, a manda un carta pa director Ricky Croes, unda den un carta hopi cortico pero cu hopi peso, a informa cu nan ta hala e MMR aden, pasobra nan no por sinta conforme nan carta, den un MT, cu tin un director na cabes, cu no ta integro.
Tin miembronan di MT cu no ta integro, den e caso aki sr Pablo, apesar di sa cu el a haya un nombramento inhusto, a viola e sistema y a bay den obheccion contra e hecho cu a hala e decreto gubernamental aden.
