Parlamentario di fraccion AVP, dr. Ryçond Santos do Nascimento a reacciona riba ponencia di parlamentario Endy Croes riba e reunion den Comision Central cu a tuma luga dialuna den parlamento. Ta trata aki di e reunion cu Minister Andin Bikker a pidi pa por haya alocacion di fondo urgente pa por cumpra 550 bulletproof vest, cumpra truck brandspuit pa Cuerpo di Bombero y permiti dos klas di polis y cuidadonan di preso.
E parlamentario di AVP, cu ta experto riba derechonan constitucional a splica cu un presupuesto ta un plan con lo gasta fondonan disponibel. Segun nos constitucion, solamente ley ta autorisa pa fiha e presupuesto di Aruba. Un minister ta obliga pa aloca fondonan conforme e ley di presupuesto.
Ningun minister mester di ningun aprobacion, di ningun hende pa aloca fondonan autorisa den e presupuesto. E minister cu ta surpasa e presupuesto mester paga e diferencia for di su mesun saco, por ehempel Minister Glenbert Croes. Ta importante pa nota cu segun Ley di Contabilidad, solamente den casonan excepcional, siguiendo un procedura stricto, por desvia di e norma di derecho constitucional aki. En todo caso nos no conoce ningun ley cu ta duna Comision Central di Parlamento e autoridad pa duna un minister luz berde pa surpasa presupuesto.
Awe Minister di Husticia, Andin Bikker, aparentemente tabata kier permiso di Comision Central di Parlamento pa bestel 550 bulletproofvest, pa lease tres ‘brandweerwagen’ nobo pa Cuerpo di Bombero y algun otro gasto sin cu tin un base den e presupuesto 2020 di su ministerio.
“Amigonan, si un minister ta bin puntra parlamento pa aloca fondo sin base den un presupuesto, e ta deber di parlamento pa bisa e minister ey cu esey no ta posibel. P’esey AVP a vota contra violacion di nos Constitucion y nos Ley di Contabilidad. Segun Endy esaki ta un argumento fofo”, asina parlamentario do Nascimento a splica.
“Endy ta bay mas leu ainda y ta bisa cu parlamento (MEP y RAIZ) a vota voor pa ‘aproba pa e minister por dal bay order e bulletproofvestnan pa e polisnan anticipando e tratamento di begroting’. Cu otro palabra, segun Endy, parlamento lo a duna e minister permiso pa actua contra nos leynan y haci e gastonan cu no ta presupuesta. Pa completa asunto, Endy ta bisa cu ‘a condiciona esaki cu e lo keda dentro di e begroting di husticia entrega na parlamento pa cu aña 2021.’ Cu otro palabra, segun Endy, parlamento lo a duna minister un voorschot riba e presupuesto di 2021. Pober Endy no a compronde kico a wordo discuti durante e reunion di awe: Dios gracia, MEP ni RAIZ a bay di acuerdo cu un violacion asina flagrante di Constitucion y Ley di Contabilidad. MEP y RAIZ a bisa cu e minister por haci tur gasto dentro di e presupuesto. Di e manera aki MEP y RAIZ tambe a nenga e minister locual e tabata kier; e minister mag di uza e fondonan cu ta resta y e fondonan ey lamentablemente no ta yega pa 550 bulletproofvest y tampoco pa e trucknan di bombero”, segun e parlamentario di AVP.
Por ultimo, e parlamentario a menciona cu e ta lamenta cu un medio di comunicacion ta publica relatonan di Endy Croes sin verifica loke ta berdad. Pasobra awe a resalta cu, despues di algun aña den parlamento, cu ainda e no ta compronde e trabou den parlamento. Of e strategia di MEP y RAIZ awe tabata di un nivel asina halto, cu Endy Croes mes no a compronde. Pasobra pa manda un relato bisando cu a aproba y den mesun rosea ta bisa e minister pa keda den e cuadro financiero presupuestario, ta un forma fini pa neng’e pasobra si Bikker tabatin e fondonan ey den su presupuesto, e no tabatin mester di bay parlamento mes. Ta pasobra cu e no tin e placa ey, el a bin pidi pa dun’e y a haya di tende cu si den cuater aña bo no a cumpra ningun brandspuit, awo den bo ultimo siman di trabou no mester mas tampoco!
