Imagina abo como mucha sa cu bo mayornan tin placa. Pero no sa cuanto, te un dia bo realisa cu nan tin HOPI placa, cu por permiti nan mes tur sorto di luho. Esaki ta e caso di Hulanda. Nan tin asina hopi placa, cu nan, of e prome minister di e pais Mark Rutte, por permiti su mes e luho di mantene un postura firme den cualkier situacion. Manera ta e caso cu e islanan ABC y cu Brussels.
Den un analisis haci door di un periodista Europeo, e ta bisa cu Hulanda no mester di placa europeo cu ta haci mas facil pa nan mantene un postura firme. Esaki minister di Relacionnan Exterior di Hulanda Stef Blok ta reconoce y ta e formula cu prome minister Mark Rutte ta aplica na esnan cu mester di fondo. Sea exigiendo reforma, respet pa Estado di derecho, pa cual na Brussels nan ta yam’e “Mister No” di Brussels.
Pa Rutte, Union Europeo ta manera un “club di amigo” unda tin tur tipo di bos of postura, aunke e ta aclaria cu e “amistad” ey no ta literal pasobra den e cumbrenan di Brussels e hefenan di Estado y Gobierno Europeo no ta topa “pa celebra e cumpleañonan” sino pa “defende e interes” domestico. Y esey no ta negociabel pa Rutte.
E politico liberal semper a rechasa e pensamento so caba di un posibel “Nexit” (un variante di e sistema Hulandes Brexit) pasobra e ta compronde cu Hulanda no por bay pa su cuenta sin UE; e ausencia di controlnan di frontera ta loke ta permiti companianan Hulandes haci negoshi libremente entre 27 pais, y pertenece na e grupo comunitario ta duna waf di Rotterdam e nomber di e waf mas grandi y importante di Europa.
Sinembargo, transferi placa pa Brussels of permiti Brussels transferi esaki pa otro paisnan ta un sumpiña den bista di Hulanda desde e crisis financiero di 2008, specialmente despues di e controversial rescate di Grecia, cu tabata e principal tema di campaña desde cu Rutte a yega na mando na 2010.
Placa pornada? “NO”
Rutte ta realmente convenci di su exigencianan, of pasobra esey ta loke esnan na Hulanda kier scucha, ta haci cu e politico liberal “no ta laga ni un euro los pornada” na su socionan europeo. Cu e mesun firmesa cu e ta pidi Spaña, Italia of Portugal bini cu reformanan estricto pa nan finanza, subiendo edad di pensioen of e belastingnan, – awo e ta exigi Polonia y Hungria mantene nan mes na e Estado di derecho como “minimo” si nan kier haya ayudo.
“Mi ta trat’e cu respet, pero e Hulandes no ta nos amigo. Loke e ta haci, con e ta pensa y loke e kier impone riba nos no ta cuadra di ningun forma cu loke e pueblo Polaco y Hungaro kier tin,” e prome minister di Hungria, Viktor Orbán, kende ta yama Rutte “the Dutch guy”, a bisa.
Si e tira bista riba Hulanda, Orbán ta admira mas Geert Wilders, cu kende el a saca un potret cu el a publica riba rednan social cu e mensahe “A nice Dutch guy”.
“Un gran heroe! Ohala nos por tin un prome minister manera Viktor Orbán! Pakico nos tin un cobarde como prome minister,” Wilders a bisa Rutte den un sesion Parlamentario, despues di enfatisa cu “placa di pagadonan di belasting” cu Hulanda ta aporta na e Fondo di Recuperacion, di 750.000 miyon euro, mester “gasta” den e Hulandesnan.
Rutte a reacciona riba esaki cu e palabranan aki: “Mi mester ta mas manera Orban? Mi mester limita e derechonan di homosexualnan y libertad di prensa” Mi ta contento cu mi no ta parce e homber ey. Teribel e cos aki.”
UN NEGOCIADOR NATO
Soltero, pianista, profesor invita na Universidad di Den Haag, un funcionario cu ta bay trabou riba bicicleta of, ora cu yob’e, den un Saab bieu cu el a cumpra segunda mano den añanan 90, ta biba obsesiona pa dirigi e pais te ora cu e no tin energia mas.
Rutte ta “zuinig” cu Brussels, pero generoso cu su hendenan, al menos pa nan bolbe scoge den e eleccionnan di maart 2021 pa su di cuatro periodo.
El a crea e fama di ta un negociado nato, capaz di forma gobierno cu e ultraderecho Wilders, y dos aña despues goberna den coalicion cu e social democratanan, uni despues na e progresistanan y conservadonan den un gobierno unico cu e ta goberna desde 2017 for di Den Haag.
Mientras cu e tabata lucha pa baha e grandura di e Fondo di Recuperacion, el a anuncia den forma sucesivo paketenan pa yuda esnan mas afecta pa e pandemia; el a entrega 3.400 miyon euro na e aerolinea KLM, e orguyo di Hulanda; y ta trata di atrae e companianan cu a spanta di brexit pa establece nan sede na Hulanda cu promesanan di acuerdonan fiscal atractivo, mientras cu e ta trata di yega na un acuerdo comercial cu Londen, vital pa sobrevivencia di e companianan local.
Imane Rachidi
