E final di un di e fasenan di Request Expression of Interest pa e refineria of otro actividad na San Nicolas, tin dos compania cu a pasa pa e ultimo fase di e proceso pa yega na algo pa e tereno na San Nicolas. E dos companianan cu a pasa pa e fase di negociacion ta e consorcio cu ta hiba e nomber di Quanten y Eagle. E prome ta interesa den reapertura di e refineria mientras cu e di dos kier traha cu LNG pa haci e refineria hopi mas factibel.
Prome minister Evelyn Wever Croes den conferencia di prensa a splica cu un comision completamente independiente (expertonan local y internacional) a scoge e dos companianan aki. Tambe tabata forma parti di e comision un Abogado local cu nan a scoge, un representante di Departamento di Asunto Economico y un ingeniero local specialisa den e tema di Medio Ambiente. E comision hunto cu e mandatario a presenta e dos nombernan aki na Parlamento siman pasa.
Awo t’asina leu cu diamars mainta ta bay firma e “Letter of Intent” (LoI) entre Refineria di Aruba (RdA) den presencia di prensa. Ambos compania lo ta presente.
E mandatario a comenta cu e ta contento pa pasa pa e siguiente etapa despues cu CITGO tabatin e pilar economico di Aruba “rehen”. “Awo nos ta bay pa e siguiente etapa, ta cuminsa un etapa nobo. Mi ta cautelosamente optimista, pasobra nos no a yega unda nos mester. Ta awo nos ta bay pa e fase di negociacion. Sinembargo mi ta hopi contento cu nos ta yega e punto aki, cu mi a kere cu nos lo no yega.”
