Durante conferencia di prensa semanal di RED Democratico, un di e topiconan tabata riba e ley di financiamento y subsidio p’e partidonan politico. RED ta keda para ariba cu na 2007 nan a traha completo riba e ley y a entrega esey, pero a manda nan cas.
Den parlamento ta sinta un parlamentario sospechoso di corupcion. Su caso tabata asina bochornoso den e ultimo dianan den Corte di Husticia y unda cu a keda presenta comosifuera ta normal aki na Aruba. A paga riba 100 mil di donacion na un candidato di partido politico pa su eleccion, tabata palabranan di dr. Rudy Lampe, miembro di RED Democratico. El a sigui indica cu suma grandi tabata cay dilanti hues cu ta duna manera donacion y presenta manera normal.
SUMA GRANDI
Asina e cosnan ey no a tuma luga. Segun Lampe, un hende no ta bay duna 100 mil di regalo pasobra e ta gusta bo. No ta asina, pasobra na momento di drenta gobierno, e ta esun cu ta bay goberna. Esun cu hinca suma grandi den campaña, e ta esun cu ta bay dirigi, tabata palabra dje ex-minister.
Por a mir’e den corte, unda cu mester a duna tereno na tal hende cu a hinca tanto placa y otro no por haya.
AVP NO A CUMPLI
Partido AVP a core cu campaña cu nan si lo bin cu ley di financiamento di partido politico. Nan a drenta na 2001 y cu mayoria absoluto. Lampe a indica cu nan no a bin cu e ley di financiamento di partido politico, pa asina fiesta por sigui. RED a bin cu ne fo’i 2007 y nan a bay cas, pasobra pueblo a vota contra di nan. Partido RED a bay cas sabiendo cu nan a bisa di no kier e corupcion aki.
