E trabou di enfermera ta uno pisa pero bunita na mes momento. E ta rekeri pa enfermeranan traha oranan largo y iregular pa asina percura cu bo ta sinti’bo mas comodo mientras pasando den tempo dificil cu bo enfermedad.
Ta pa es motibo cu tur aña durante e di dos siman den luna di mei ta celebra tur persona cu ta eherce e trabou bunita aki. Celebracionnan ta culmina dia 12 di mei, cual ta e fecha natal di Florence Nightingale, un dama cu ta wordo considera e persona tras di e modelo moderno di enfermeria.
Esaki ta e di 3 biaha cu Rotaract Club of Aruba ta uni hunto cu S.A.B.A. pa asina gradici e enfermera y enfermeronan pa nan trabou. E aña aki cu ayudo di Aruba Aloe a prepara 162 pakete di “self care” hunto cu un pakete di cuki. Algun miembro di Rotaract Club of Aruba a traha e cukinan individualmente na cas mirando ta dificil pa trece e club hunto durante e temporada aki. Den pasado, e team di Rotaract ta tuma tempo pa haci e entrega di e regalitonan personalmente.
E biaha aki esaki no ta posibel mirando cu mester mantene na e reglanan di distancia social. Pa segura cu tur precaucion ta wordo tuma, presidente di club, Diantha Boekhouwer, a haci e entrega dialuna mainta trempan pa asina duna ekipo di S.A.B.A. suficiente tempo pa desinfecta e paketenan prome cu parti nan dia 12 di mei.
Ademas, por a tuma nota di varios post cu e club a comparti riba nan social media durante e delaster dianan unda ta pone e “spotlight” riba algun di enferemeranan cu ta traha na diferente cas nan di S.A.BA. Pa medio di e postnan aki kier introduci un paar di e caranan cu ta eherce e bunita trabou y tambe tende for di nan kico ta inspira nan pa haci nan trabou cu hopi amor.
Rotaract Club of Aruba kier gradici Ivy Goeloe-Peterson y Monique Larmonie di S.A.B.A. pa yuda cordina e proyecto aki, Aruba Aloe pa yuda haci e proyecto aki un realidad, e team cu a prepara e regalonan y tambe tur miembro cu a yuda pensa maneranan creativo pa honra nos enfermera y enfermeronan. Por ultimo, Rotaract Club of Aruba kier felicita tur enfermera y enfermeronan riba nan dia. Awe mas cu nunca nos ta agradecido pa e trabou incansabel cu ta rekeri hopi amor y pasenshi, specialmente den e temporada aki unda nos ta combatiendo COVID-19. Danki pa tey den e momentonan aki unda nos ser kerinan no por ta banda di nos y danki pa brindanan cuida te ora nos por ta back cu nan.
