Corte a trata e caso di e dos polisnan cu a tira un persona na Sero Pita, consecuentemente e homber a fayece. No a declara nan culpabel, pero si hopi hende a reacciona riba e resultado. Polis ta haci su trabou pa proteha pueblo, pero no ta haci esey cu mal intencion.
Rodney Solognier, presidente di SPA, a indica cu pueblo no ta contento con e caso a bay di e dos agentenan policial. E ta haya algo tristo pa tende e comentarionan, pasobra e dos polisnan a bay haci nan trabou. E caso specifico na Sero Pita, ta un persona cu tabata hopi problematico. Durante hopi aña polis a presenta na e adres p’e persona masculino aki.
Na varios ocasion a detene e persona aki, y tur momento cu polis a bay p’e tabata pasobra e famia mes a yama. Loke polis ta haci ta su trabou. Manera cualkier otro persona ta haci nan trabou, ta un trabou nan ta haci.
Polis tabata conoce e persona aki, y varios bes a bay cerca dje. Tur biaha cu un polis bay un cas of situacion ta haci esey pa mantene calmo, pero tambe pa trece paz y trankilidad na cada hogar. Segun e sindicalista, na ningun momento nan ta bay cu e intencion di tira hende, maltrata hende, dal hende na ningun parti.
Den e caso di Sero Pita, Wilson Bermudez a sali riba e polisnan cu su arma blanco. E polisnan a haci nan trabou. Den un caso specifico asina aki, kico comunidad por spera con polis lo atende esaki, segun Solognier por traha yen escena di loke a pasa. “E momento ey ta Dios, e colega y e persona cu ta causando problema.” E colega tin cu tuma un decision y tin di pensa kico pa haci y con. Si no tuma e decision ey, e ta su bida.
Polis a presenta pa tene e situacion calma y no pa haci daño. Semper a existi autoridad den tur nacion, tur pueblo y pais. Semper mester tin esey pa mantene orden n’e luga. Locual polis ta haci ta mantene orden. Cu cos ta bay un tiki fo’i sla of hopi, e polisnan ta presenta pa haci nan trabou. Nan no ta bay cu mal pensamento na ningun momento.
E sindicalista a enfatisa cu pa tres aña e dos polisnan mes tabata pensa kico ta bay pasa, con e ta bay pasa. E no tabata confortabel pa nan, pasobra pa resto di nan bida nan tin di bay biba cu e cos aki.
