Diferente exito ta representa e banda cu ta gosa di un sosten masal y stimacion grandi riba nos isla. Ta trata aki di Rincon Boys cu pa decada a sa di deleita y trece alegria durante caba presentacion cu nan a haci.
Recientemente a haya oportunidad di sinta un rato y haya un bista di kico tur tin na caminda pa Rincon Boys pero tambe scucha un poco di locual e banda aki a bin ta cosecha te cu awo. Den combersacion cu Chendell Beaumont a haci e pregunta cu kisas hopi ta haci, den e trayectoria di e banda cua segun nan ta e exito di mas grandi te cu awe.
Recoriendo e bahul di recuerdo te cu awo, Chendell ta di pensamento cu e cancion ‘Ta mi hendenan’ ta un di e mas grandinan den tur e exitonan, aunke no por laga afo e gran tema di ‘Porfin tin un homber’. Den e carera musical di e banda ta papia di aproximadamente 7 pa 8 album, ademas di e singlenan cu ta cancionnan cu a subi red social.
Un temporada cu no solamente Rincon Boys pero por bisa mundo completo a paralisa, tabata e temporada di pandemia cu a causa un paro pa locual ta trata produccion pero una bes a surpasa esaki mesora e banda a yega na otro bek y a cuminsa ensaya pa asina pone e banda bek riba su ritmo normal.
Chendell Beaumont ta splica cu e no tabata facil, aunke su persona y porta algun otro musico a purba mantene e ritmo di practica musica, e no tabata e caso pa tur hende. Pero una bes peticion pa presentacion a cuminsa drenta, a cuminsa move bek poco poco te ora a lanta cabes bek. No manera tabata pero den bon direccion.
Rincon Boys no ta para keto y ta sigui tanto local como internacional. Un di e presentacionnan aki lo ta na nos isla ruman Boneiro pa Dia di Rincon pero tambe riba agenda un/algun presentacion na Hulanda. Pa locual ta Corsou, tin di bisa cu Rincon Boys ta preparando pa bula pronto pa eynan y asina sigui riba e ruta di exito cu nan ta custuma cu ne.
Si bay papia riba produccion nobo, tin di bisa cu ademas di a saca un caba, e banda tin otro cancion den un 80% cla y cu pronto lo sali riba mercado pa e publico por disfruta di dje. Pero no ta e unico, ta preparando varios otro cantica cu a drenta studio caba cu nan. Chendell ta di pensamento cu den transcurso di e lunanan nos dilanti lo por scucha sigur e exito nobo nan aki.
No ta descarta un album cu produccion nobo aunke tin di sondea e posibilidad aki bon como cu e no ta algo cu ta bende mescos cu antes. Mas probablemente lo finalisa cada cancion, produci video clip pa nan y asina presente na e publico cu ta en espera di algo nobo for di Rincon Boys.
Rincon Boys tambe ta probecha e oportunidad pa gradici e comunidad di Aruba cu semper a sa di sostene e banda den su diesseis aña di trayectoria musical. Di su banda Chendell a expresa cu e no tin palabra pa caba di gradici Aruba pa tanto aña di aprecio y sosten. Por sigui conta cu Rincon Boys, e band lo t’ey pa semper y por spera hopi exito mas di nan parti.
