Diabierna e politico y ex-legislado Richard de Mos di Den Haag a haya un sentencia di vrijspraak (absolvi) pa e caso di corupcion den cual e tabata un sospechoso. E ex-wethouder Rachid Guernaoui tambe tabata absolvi p’e Corte di Rotterdam.
Despues di a scucha e veredicto, de Mos a brasa e otro acusadonan, cu tambe a haya vrijspraak, na yoramento. Riba tribuna tabatin aplauso fuerte, grito y hende batiendo n’e bentana. De Mos a bisa prome cu e veredicto cu e no tabata spera “nada mas” cu un absolucion, pero asina mes e tabata hopi nervioso.
De Mos a bisa di tabata hopi alivia cu corte a absolv’e. “Semper mi a actua di buena fe. Pero si bo scucha e bon despues di tres aña y mey, e ora bo ta sinti alivio”, el a bisa despues di e veredicto. Ministerio Publico a califica e absolucion di “decepcionante” y ta considerando pa apela, segun un vocero.
Den un sentencia extenso, corte a elimina tur alegacion di Ministerio Publico. “Di gran importancia den e veredictonan ta cu no por a demostra e intencion maligno di e empresarionan involucra den e donacionnan di e partido. Defacto, e donacionnan ta mustra di tabata haci cu bon intencion”, e hues a bisa.
Ministerio Publico a exigi un castigo di prizon condicional di 22 luna contra di de Mos. Guernaoui a scucha un demanda di diesseis luna di prizon, di cual seis tabata condicional. Segun Ministerio Publico, e empresarionan amigo a yuda e ex-legisladonan a cambio di donacion pa su partido. Por ehempel, nan lo a yuda nan cu permiso nocturno di horeca y vastgoedprojecten.
Den e caso aki, den cual tabatin ocho persona envolvi, a trata mas di shen mil Euro na donacion di partido na Hart voor Den Haag/Groep de Mos. “Cu e miho boluntad di mundo no por determina cu, y si ta asina, den cual medida, e posicion di de Mos y su colega a mehora p’e donacionnan di e partido”, hues a bisa.
De Mos y Guernaoui, tur dos actualmente ta miembro di gemeenteraad di Den Haag. De Mos tambe ta miembro di e hunta general di Hoogheemraadschap van Delfland. E fundado di e partido local Hart voor Den Haag/Groep de Mos ta Richard de Mos. Na 2018, e partido aki a gana cu e mayoria di cantidad di voto den e eleccionnan municipal di Den Haag. De Mos y Guernaoui a bira legislado. Un aña despues, Rijksrecherche a drenta nan oficina di stadhuis y den nan cas.
