Despues di un dushi temporada di vacacion bon mereci, nos mucha-, hoben- y maestronan ta cla pa cuminsa un aña escolar nobo cu hopi energia y positivismo. Semper e meta di un aña escolar ta pa siña mas, pa crece mas, conoce amigo- y amiganan y docentenan nobo y traha hunto pa haci e aña escolar exitoso.
Kico ta e ingredientenan pa un aña escolar exitoso?
E forsanan di caracter ta e partinan positivo di nos personalidad cu ta haci nos sinti autentico y comprometi. Eseynan ta un parti central y fundamental di ken nos ta. Nos puntonan fuerte ta liga na nos desaroyo, bienestar y satisfaccion den bida. Nan ta influencia con nos ta pensa, actua y sinti. Asina nos ta representa loke nos ta balora den nos mes y den otro. Ora nos ta uza nos puntonan fuerte, investigacionnan ta mustra cu nos por tin un impacto positivo mas influyente riba otronan, mehora nos relacionnan y aumenta nos bienestar y felicidad.
E ora, na unda nos por cuminsa? Reconociendo nos puntonan fuerte, claro!
Cada forsa di caracter ta cay den un di e seis categorianan di virtud, cu ta universal den tur cultura y nacion.
Sabiduria: E punto fuerte aki ta util pa yuda nos siña y acumula conocemento.
Curashi: E forsa emocional aki ta capacita nos pa enfrenta tur adversidad y con nos por supera nan.
Humanidad: E punto di fortaleza aki, ta bin den wega pa yuda nos construi y mantene relacionnan positivo y caluroso cu otro personanan.
Husto (husticia): Cu e punto fuerte aki, nos ta relaciona nos mes cu esunnan cu ta rondona nos den situacionnan social of den grupo.
Templanza: E punto fuerte aki ta yuda nos pa maneha nos habitonan y proteha contra exceso, incluyendo con pa maneha y supera nos bicionan.
Transcendencia: Manera un virtud, e forsa di transcendencia ta conecta nos cu e mundo rond di nos di manera significativo.
Conociendo nos puntonan fuerte, ta permiti nos uza conscientemente loke ta beneficia nos y desaroya loke por resulta nos util.
Palabra di exito
Al final, mi ta desea tur alumno y maestro y maestra cuminsando for di scol primario, scol basico, secundario te cu esunnan avansa, hopi exito, animo, pasenshi y perseverancia durante e aña escolar nobo 2023-2024. Na e mayornan tambe, ban sigui stimula y motiva e yiunan pa haci nan best na scol pa asina nan tin un bon educacion.
