No a tende oficialmente for di Douane kico ta henter e situacion pa loke ta nan comodidad, trahando na waf di Barcadera, na momento cu e huma di WEB a cuminsa afecta caba diferente grupo cu ta trahando eyriba. Douane tambe ta preocupa. E hefe di Douane tambe tabata presente na waf di Barcadera recientemente.
Ricky Croes a comenta cu diamars ultimo el a haya un yamada for di un di e trahadonan di waf, caminda cu ta indica cu e huma ta molestia nan. El a bay eynan y a mira en realidad cu tabata tin poco molester di huma. Naturalmente, teniendo cuenta cu nan salud, cual ta algo hopi importante, mester yega na un areglo cu e personanan, kico pa haci. A bay y a mira kico ta pasando eynan.
Cu ken a papia
Tabata tin acuerdonan cu a wordo haci cu leiding di ASTEC y naturalmente minister tambe a bisa cu e tambe kier wak. E mes a bin eynan. Manera cu tur sa, e dia prome cu tabata dialuna, ya tabata tin cierto palabracionnan cu ATIA, ASTEC, cu WEB mes. A sinta e ora diamars cu ASTEC pa mira con por yega na areglonan. Tin cu tene cuenta cu e ta algo cu ta malo pa e salud di hende. Pero di un otro banda mester wak con economia di Aruba ta draai y con ta yega na areglonan cu ta short term, pasobra manera cu tur hende por a wak den corant awe y ayera, tabata tin e rueda di prensa di WEB, hunto cu minister. Nan ta bay purba di haci algo mas lihe cu ta posibel pa esey. Pero den e caso aki Douane, cu tambe ta traha eynan y tambe ta preocupa cu salud di tur e trahadonan, mester wak con ta yega na algo cu ta beneficioso pa tur.
Douane mester tey
Douane mester tin su control. E ta un porta y ta poni den nos leynan tambe cu eynan tur e productonan cu ta drenta Aruba mag di drenta. Den e caso aki sa cu ta un containerpoort y eynan e containernan ta yega. Douane mester tin su control riba e containernan cu ta sali, pa asina ey nan seya e containernan y pa ora e yega na su luga, pa e Douane cu ta na e luga e ora, por haci e controlnan necesario.
E parti cu mas ta wordo afecta
Ricky Croes a splica cu waf ta grandi. Tin dos grandi. Tin e parti di ISPS, e parti di container, unda cu tin e main gate y tin e parti di west gate, unda cu tin e barkitonan mas chikito cu ta staciona, cu ta e non-ISPS waf. Eynan tin hende ta traha normal. E parti cu ta wordo afecta ta e parti pariba. Unda cu ASTEC ta traha, unda cu e containernan ta yega. Croes ta pensa cu e tin di haber cu e biento den e dianan aki cu nan ta haya hopi mas molester di e huma.
Normalidad
Croes a comenta cu Douane ta dunando tur su cooperacion y tin cu wak e rapportnan cu tin cu wordo traha den pasado cu a haya for di ASTEC. Nan kier wak kico tur a wordo haci. Kico tur tin, kico ta e peligernan pa yega na un manera cu por duna servicio. Den e caso aki a wak cu e exposure mester ta menos y por parti e wardanan e ora. Nan ta traha menos na e luga y di un otro banda ta wak cu e biento ta bira bay bin. Tambe tin cu bisa ora cu no tin biento of e biento ta hibando e huma pazuid, por traha. Diamars mes, ora cu tur cos a keda cla, ora cu ta mas trankil cu por a traha, Douane a duna su cooperacion y a keda te cu 9’or na e luga, pa asina por duna e servicio.
Cuanto hende ta den funcion
Pa cada shift di 8 ora, banda p’ariba na e containerpoort, tin 2 ambtenaar. E container ora e wordo laga liber, e ta wordo haci door di un otro departamento. Banda p’abao tin mas douane ta traha. Awor aki cu tin menos barco ta bin, e actividad ta menos. Tin cinco ploeg ta traha y cada ploeg tin mas of menos cinco hende den dje. Banda di dje tin e chef, hende cu ta haci factuur controle. Tin diferente hende cu ta traha na e seccion eynan.
