E no ta asombra nos mas ora nos ta tuma nota con Minister-President mr. Evelyn Wever-Croes ta tuma pueblo haci. No solamente esunnan cu no a vota p’e sino abo tambe cu cada biaha ta pone bo confiansa den e partidonan tradicional MEP y AVP. Diamars dia 4 di october pasa gobierno a declara via entre otro su pagina di Facebook cu Bureau Integriteit Aruba ta bay introduci “vertrouwenspersoon integriteit “ y “interne onderzoeker”. Den e articulo gobierno corectamente ta ilustra cu integridad ta sumamente importante pa bienestar di nos pais y comunidad. Ey mi ta dun’e tur rason.
Ta asina si cu sino ta pa Partido ReD Democratico cu desde su prome entrada den Parlamento na 2005 no solamente ta papia di integridad sino ta mustr’e tambe den accion awe no lo ta papiando mes di un Bureau Integriteit. Dr. Armando “Rudy” Lampe a hasta sali ariba portada di un media cu su dicho: Integridad bo tin e of bo no tin e. Minister-president actual a haya e slogan asina bon cu el a dicidi di uz’e pa su mes. Den prome programa electoral di ReD na 2005 a propone bin cu un Bureau Integriteit y p’esey den programa di gobernacion di 2017 a copia literalmente tur loke ReD a skirbi tocante integridad y ta p’esey a bin Bureau Integriteit.
E pregunta ta cu si tin tanto integridad na pecho dicon no a bisa nada cu ex-minister Otmar Oduber tabata bou investigacion? Dicon ta te awo ta papia di investigacion haci riba ex-minister Marisol? Que hubo di vacuna-gate y tur e otro gatenan cu tin demasiado pa menciona? Mi a yega di declara den Parlamento cu prome cu mi a drenta den Parlamento mi tabata conoce e wega di polis cu ladron pero cu eyden mi a ripara cu nan ta hunga ladron cu ladron. Nan ta horta y masacra e pueblo y e pueblo ta bolbe pone nan na poder, increible, tristo y berdad.
Minister-president tin palabra masha bunita y asina ta convence un cantidad di hende cu ta scoge pa no wak e gañamento sin fin y falta di vision pa hiba e pais aki dilanti. Ora cu ReD a propone legalisacion di cannabis como pilar economico nobo y a mustra cu cifras un total di afl. 500.000.000,00 y cu esaki ta realistico, minister-president a haya masha oportuno pa laga haci declaracionnan den Parlamento bou di encargo di Minister di Economia mr. Xiomara Maduro gañando tur hende cu legalisacion di cannabis medicinal lo bira Aruba su di dos pilar economico nobo. Esaki el a haci den tratamento di presupuesto na december 2018 den Parlamento di Aruba.
Asina aki tambe a tene ReD na liña pa cu legalisacion despues cu Daphe Lejuez a bandona fraccion di MEP. Esaki tabata e momento cu defacto ReD a haya un yabi di gobernacion y no prome (manera hopi hende ta pretende). ReD a purba den e corto periodo cu a wordo acompaña pa un pandemia pa mira si e por logra haya su partnersnan den coalicion MEP cu POR pa cumpli cu e acuerdo di gobernacion firma entre e tres lidernan.
Strategicamente a tene ReD na liña pero na final e berdad a sali na cla. Awe ni papia ta papia di cannabis pero ta scoge pa bay saca e mesun afl. 500.000.000,00 na BBO for di saco di pueblo perhudicando tur hende incluyendo e comerciantenan y nos economia en general. Esaki ta e pilar economico di MEP/RAIZ.
MEP mester a caba cu ReD “cueste lo que cueste” y a keda sin legalisa, masacrando e pueblo por completo pasobra awo ta cu BBO nan ta bay saca e mesun afl. 500.000.000,00 for di bo saco pa yuda nan maneho deficiente y sin vision. Minister-president a prefera di sacrifica e pueblo di Aruba djis pa caba cu un partido di un asiento, dicon? Awe tur prueba ta tur caminda pa esunnan cu kier realisa cu ta esaki a tuma luga. Poco ta esunnan cu e grandesa te awo pa a acerca nos y admiti cu nan a cay den trampa di kere cu ta ReD a faya.
Pa un pais tin oportunidad di sobre sali y para stabiel financieramente y den su compromisonan internacional e ta indispensabel pa su pueblo ta critico, educa y husto. Cada 4 aña pueblo ta haya e oportunidad pa dicidi e rumbo di su pais. Cuater aña riba su mes no ta hopi pero si e ta suficiente pa haci bon of comete un daño cu por tuma diferente generacion pa recupera di dje.
Bo voto ta un arma poderoso, uz’e bon, uz’e sabi y consciente.
