Diasabra 1 di mei 2021, algo mas cu 1 luna prome cu eleccion, minister-president a ricibi un carta for di Arubahuis conteniendo diferente preocupacion pa cu e comportacion di ex-minister plenipotenciario Guillfred Besaril. E carta en corto ta bisa lo siguiente. E carta ta poni como anexo pa pueblo mes por lesa locual mi a ricibi.
Un grupo di ambtenaar cu ta den nan mayoria sostenedo di MEP (segun nan mes ta describi den e carta) a dirigi nan mes pa medio di un carta na prome minister Evelyn Wever-Croes. Den e carta nan ta trece padilanti cu pa un periodo largo caba di mas cu 3 aña nan ta preocupa y cu nan tin obhecionnan moral y di etica y un fuerte sensacion di insiguridad den relacion cu e funcionamento y e accionnan indebido di e ex-minister. E grupo ta describi con ex-minister Besaril tabata haci y deshaci na su antoho cu placa di pueblo como sifuera ta di dje mes e ta. E grupo a comparti cu minister-president Evelyn Wever-Croes un lista di prueba cu nan a acumula contra e minister y a pidi minister-president pa si ta posibel no pone ex-minister aki ni ariba su lista mas, cu nan mes a realisa cu por ta tabata laat pa esey caba paso ya e lista pa eleccion 2021 tabata cla dia bieu.
Den e carta ta menciona con ex-minister Guillfred Besaril a pone Arubahuis den cora, cos cu masha tempo no a sosode. Tambe a menciona con a dicidi di bay huur cas y drecha hardin costando decenas di miles di Euro mientras cu Aruba ta den crisis financiero. Pregunta di parti di ReD ta: Unda e control di gobierno a keda? Unda integridad a keda? Anto ta trata di un ex-agente policial. Locual tur hende por wak den e carta manda pa minister-president ta cu minister-president ta bay over na pidi e nomber di esnan cu a acomula e pruebanan y traha e carta. Dimes e no a ricibi esaki paso dje tapa ey toch nan no ta. A pone mi na altura cu nan no a haci nan mes conoci na minister-president pasobra nan ta teme pa persecucion politico. Nan tabata teme cu Besaril lo termina bek como minister plenipotenciario di MEP cu tur e consecuencianan cu esey por tin. Imagina bo e delirio di grandiosidad cu ta biba cerca e hendenan aki te cu e ex-minister ta bay biaha su biahe di placer y e no tin suficiente cu un bon salario sino riba dje ta bay gasta placa di pueblo pa huur y hunga grandi den VIP Lounge na Schipholl. Bale la pena p’e mandatarionan di MEP aki cu pueblo a scoge.
Mientras ex-parlamentario Sue-Ann Ras tabata wak Netflix den Eerste Kamer na Hulanda durante un reunion importante y a scoge pa gaña cu ta pasobra ex-parlamentario Ricardo Croes tabata na palabra el a dicidi di bay wak Netflix y despues tur hende por a wak e grabacion cu tabata mustra cu ora e tabata wak Netflix, Parlamentario Croes tabata sinta su dilanti mes, menos cu 1 meter leu. Guillfred Besaril tabata biba lekker na Hulanda y tabata hunga grandi riba custia di pueblo. Besaril a traha acuerdo cu amigo pa organisa e actividad nan di Arubadag sin cu e amigo sa kico e ta haci pasobra e no tin experiencia den esaki, segun e carta ta bisa. Ta cu ki intencion e ex-minister aki por a actua asina aki? Ta ki beneficio e ex-minister por tin pa cera un deal asina. Ta cua ta e beneficio pa pais Aruba cu un comportacion asina aki? No tin ningun control di parti di gobierno di Aruba riba e manera di funciona y comporta di su minister plenipotenciario na Hulanda y/of Merca? Segun ami a compronde, minister-president Wever-Croes tabata na altura for di 2020 caba cu e integridad di Besaril tabata wordo cuestiona door di su coleganan pero a scoge pa manda esaki doofpot cu tur e consecuencianan. E acusacionnan haci den e carta aki ta hopi serio mes pa Partido ReD Democratico. Partido ReD Democratico ta puntra su mes ta kico integridad ta significa pa Gabinete Wever-Croes II. Unda Ursell Arends a keda?
