Multitud rond di Grote Kerk na Den Haag a aumenta. Awe e cayanan di Den Haag a bira druk, e hendenan a reuni cerca di Grote Kerk pa mira e yegada di e diputadonan y despues, e rey y reina di Hulanda. Awe e monarkia Hulandes ta celebra Prinsjesdag. Mesun cos cu aña pasa, e rey a duna su discurso ‘Troonrede’ den Grote Kerk enbes di e Ridderzaal, esaki pa motibo di distancia social. E celebracion ta conta cu mas o menos 270 persona den e iglesia.
Ademas di e miembronan di e estadonan general, e senado y e representantenan di eerste y tweede kamer , tambe ta conta cu presencia di e ministernan di e gabinete demisionario. Varios individuo cu sa participa den esaki no por atende e aña aki debi na e restriccionnan relaciona cu Coronavirus.
Den su discurso, Rey Willem-Alexander a reflexional riba tur e cambionan cu e pais y mundo henter a presencia den e ultimo aña. El a menciona entre otro e problemanan manera mercado di vivienda y emision di nitrogeno. Tambe el a referi na e crisis climatico y a menciona algun otro ehempel manera e inundacionnan y e crisis na Afganistan. El a tuma un momento pa menciona e crisis di Corona y a bisa cu mester contesta dos pregunta importante: Nos ta prepara pa un pandemia nobo y con nos por garantisa cu e asistencia sanitario sigui ta accesibel den futuro?
Caribe
Pa loke ta trata e parti Caribeño di e Reino, e rey a splica cu bida a bira mucho mas dificil pa hopi persona debi na e pandemia, ya cu e economia circular a keda hopi afecta pa e declinacion den turismo. Asina el a enfatisa cu a establece acuerdo cu e paisnan di Corsou, Aruba y Sint Maarten pa garantisa cu e apoyo financiero conduci na un economia mas resistente na golpi. El a termina bisando cu ta importante pa permanece uni den nos debatenan. Esaki lo haci cu nos Reino ta bira mas fuerte den su totalidad.
