Diaranson 29 di maart 2023, Aruba Trade and Instustry Association (ATIA) a tene su reunion general di miembresia den e “New ATIA Building” unda a debuta oficialmente e sala di conferencia y fachada nobonobo.
Prome cu e parti oficial, Herrick Henriquez, Director di ATIA, a duna un presentacion interesante riba e tema di “Strategia di ATIA” pa 2023 y futuro. Henriquez a presenta en breve e cuater pilar nan pa ATIA sigui den un rumbo exitoso.
Durante e reunion a presenta e resultadonan di e aña anterior y e enfoke pa 2023 y alabes a eligi e miembronan di e hunta di directiva pa aña 2023 – 2024.
Durante 2022, ATIA su enfoke tawata riba recuperacion di Aruba su economia y a participa den varios stakeholders meeting pa cu “landspakket” riba e temanan di reforma fiscal, ley laboral, y clima di inversion den nos economia (“red tape”).
Tambe ATIA a sigui enfoca durante e aña riba desaroyo di e habilidadnan y experticio di su miembronan y nan empleadonan por medio di diferente workshops, sesion nan di informacion y eventonan pa engrandese e netwerk di miembronan di ATIA. Workshops nan exitoso tawata “Start-up week”, “Continued Financial Excellence Program, “Lunch and Learn – digital payments” y “People Management Seminar – Mental Health in the workplace”. No por a lubida e Business Mixers cu tawata hopi bishita, pero tambe e eventonan di “Year of Purpose” cu tawata: LIDERA “Purpose as Power”, “Youth Athlete Event” y tambe ATIA su Corporate Event anual.
Pa aña 2023 – 2024, e hunta di directiva a dispidi di dos miembro cu a forma parti di e hunta pa hopi aña, esta Ronald van Trigt y Tristan Every.
ATIA ta gradici Ronnie y Tristan pa tur nan añanan di aporte valioso como miembro di hunta di ATIA. Lo eligi e presidente, vice-presidente, tesorero y secretaria nobo durante e prome reunion di e hunta durante e luna di april y ATIA lo anuncia esey ora nan a wordo eligi.
E hunta di directiva di ATIA pa 2023 – 2024 ta consisti di: Frank Snijders, Gina Habibe, Tito de Cuba, Tisa LaSorte, Roland Croes, Mattijs Bijen, y Andrew Harms. ATIA ta contento pa anuncia su dos miembro nan nobo nan cu ta Jennifer Figaroa-Guzman y Danilo Werleman.
E reunion a culmina cu un networking event pa e miembronan presente unda ATIA a debuta su “Bao Palo Terrace”.
ATIA
A funda Aruba Trade and Industry Association (ATIA) na aña 1945 y ta e organisacion principal cu ta representa empresa- y empresarionan como tambe comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org of nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association
