Despues di dos evento di prebenta bon atendi aña pasa, Caribbean Town Aruba a anuncia e di tres evento di prebenta di cas. Esaki lo tuma luga diabierna y diasabra awo, dia 18 di februari pa 4:00 pm te cu 8:00 pm y dia 19 di februari, entre 10:00 am te cu 8:00 pm. Tur persona cu tin entre otro, un peticion pendiente pa un tereno erfpacht na DIP, ta invita pa bishita e di tres expo di prebenta di Caribbean Town – Villas & Apartments cu lo tuma luga na Boulevard Events Aruba, situa na Schotlandstraat # 45.
E prome fase di construccion di e proyecto di condominio aki ta consisti di dos toren, esta e edificio di “Turks & Caicos” como tambe “Guadeloupe”. Esakinan ta representa un total di 126 apartamento residencial, sostenibel y moderno cu na mes momento ta accesibel na nos comunidad local cu ainda no a logra yega na nan propio vivienda. Ademas, pa tur esunnan interesa den un concepto di vivienda diferente di e edificionan di condominio tambe tin 20 “townhouses” y 16 “villas” disponibel pa reservacion. Prijs di e unidadnan durante e expo di prebenta aki ta cuminsa for di 155 mil florin y por yega te cu 330 mil florin.
Segun Jennefer Dirks, gerente di mercadeo y benta di Caribbean Town, e acogida te cu awo ta hopi positivo y un gran cantidad di unidad ta reserva caba. Pues, si tuma esaki na cuenta, ta premira cu pronto e prijsnan di etapa di prebenta lo subi den anticipacion di e fase di construccion.
E intencion ta pa tur persona local en busca di vivienda cu ta cumpli cu tur rekisito necesario, por yega na nan propio cas of apartamento na un prijs atractivo. Esaki ta posibel pa nos comunidad local cu e proyecto di Caribbean Town Aruba, danki na hopi sosten y cooperacion di parti di Gobierno di Aruba como tambe DIP, pa por a yega na e tereno den e area di Eagle-Bushiri.
Caribbean Town Villas and Apartments, ta e prome proyecto di condominio pa local. E proyecto di residencia innovativo y sostenibel aki ta consisti di 328 unidad residencial total: 256 apartamento, 40 town houses y 32 villa. Ademas, e ta inclui pool, cancha di deporte multifuncional, un plasa unda por socialisa, un parke pa mascota, un outdoor fitness center y un espacio pa polis di bario cu lo integra den e vecindario di Eagle.
E director di e compania desaroyado, Ing. Victor Acosta, a anuncia cu construccion lo cuminsa na april di e aña aki y cu e prome viviendanan lo ta entrega na fin di 2023.
Pa mas informacion por tuma contacto cu Caribbean Town Villas Aruba na 5867300, [email protected] of bishita nan pagina di Facebook y haci un tour virtual di cada modelo di vivienda riba www.caribbeantownvillas.com
