Oficina di Turismo di Aruba (A.T.A.) a crea un evento special cu, no solamente ta esun di mas grandi den Caribe den su estilo, pero tambe ta genera un atencion global. Un grupo di mas cu 200 pareha for di diferente parti di mundo a atende e invitacion haci door di A.T.A. pa, den cuadro di ‘Romance Awareness Month’, a biaha bin Aruba y forma parti di un ceremonia masal di renobacion di voto matrimonial riba beach. Hopi di e parehanan tabata sperando e oportunidad aki despues cu nan a wak imagennan di e prome evento aña pasa.
E actividad ta forma parti di e campaña promocional ‘Aruba I Do’ pa cu promocion di nos destino turistico, atrabes di oficinanan internacional di promocion, pa fomenta e mercado di romance. Estadisticanan ta mustra cu e mercado aki ta representa un segmento considerabel di nos turismo, generando un entrada substancial pa nos economia. E ta inclui parehanan cu ta compromete, casa y pasa nan honeymoon riba nos isla.
Nos bunita bahada di solo y e mundialmente famoso Eagle Beach tabata e escenario ideal pa e ocasion special cu A.T.A. a percura pa tabatin den e estilo unico cu Aruba so por ofrece. Hunto cu diferente compania local experto riba e tereno aki, a crea un ambiente romantico y tropical cu e parehanan a disfruta enormemente. Nan a elogia y gradici Aruba pa e momento inolvidabel cu pa semper lo conecta nan cu nos isla.
Mas leu ainda, e parehanan a comparti nan experiencia y sentimentonan cu famia y amigonan atrabes di medionan social, loke na su luga a hala hopi atencion rond mundo. Aña pasa, e evento aki a genera cobertura riba nada menos cu 308 diferente canal, corant, revista y website internacional. A registra tambe 8.2 miyon impresion di e hashtag #Aruba I Do riba Twitter y 15.2 miyon riba Instagram. A.T.A. ta hopi satisfecho cu e resultado obteni atrabes di e strategia promocional aki.
Ademas tawatin presencia di algun celebridadnan entre otro Ashley y J.P. Rosenbaum — conoci door di e serie di “The Bachelorette,”. E pareha ta casa pa mas cu 6 aña.
Lydia & Doug McLaughlin tambe ta un pareha celebridad cu ta conoci door di “The Real Housewives of Orange County” y nan a inicia nan propio publicacion di ‘estilo di bida’; Nobleman Magazine.
Oficina di Turismo Aruba ta gradici tur esnan cu, di un manera of otro, a contribui na e grandioso exito di e campaña y specialmente na e bunita ceremonia riba beach, incluyendo e parehanan mes. A.T.A. ta convenci cu miyones di persona rond mundo cada bes mas ta wak nos isla como e luga perfecto pa romance; pa compromete, casa, honeymoon y renoba votonan matrimonial. Esaki ta traduci den resultadonan positivo pa Aruba su turismo y economia den e añanan nos dilanti. Pa mas informacion, bishita www.aruba.com/arubaIdo of busca hashtag #ArubaIDo.
