SABA a entrega su relato anual. Sinembargo den e conferencia di prensa di minister Dangui Oduber, unda cu el a menciona cu nunca a trece e relato anual dilanti.
Director di Stichting Algemene Bejaardenzorg Aruba (SABA), Remo Kock, a invita prensa pa mira e presupuesto anual. “Nan t’ey y si hende kier bisa cu nan no t’ey, ami no por yuda. E jaarrekening tur aña ta entrega,” ta loke cu Kock a bisa. El a agrega cu tur aña Coordinatie Output Subsidie ta hay’e fo’i SABA.
David Meijer, presidente di hunta di supervision, a indica cu e presupuesto anual ta un Samenstellingsverklaring. E protocol cu e minister a referi na dje, ta exigi un audit. Ta un grado mayor di standard cu ta uza pa por traha e presupuestonan anual.
Loke ta pasa, cu pa yega ey, e ta bay tuma mas of menos 200 mil florin extra, pasobra mester di personal adicional pa por haci ‘functie scheiding’ den e proceso di administracion di SABA mes e ora, entre otro. Tin cu busca personal adicional y tin gasto di accounting tambe cu ta relativamente halto.
Kock a indica cu fo’i cuminsamento, cu a cuminsa cu output na 2017, a bisa gobierno cu SABA no por cuminsa cu audit, pasobra e tempo ey a cay bao di gobierno, unda cu ta entrega tur papel pa haya salario y e cachi cachi di e subsidio pa operacional, diripiente tin cu traha bedrijfsmate cu un audit y esey no tabata por, segun Kock.
Mester bay traha den e organisacion pa haya tur protocol y hende y tambe e placa adicional pa por huur in un accountant di afo cu ta costa hopi placa pasobra esakinan ta RA, hende cu ta bon studia, pa por haci e audit. Tur accountant cu SABA a pidi cual tabata tres, a bisa cu no por bay pa un audit pasobra SABA no ta cla p’e y lo dura algun aña prome cu yega eynan.
