Diasabra 28 di september Fundacion Parke Nacional Aruba (FPNA) ta invita comunidad di Aruba pa presencia e Nochi di Pelicula na Parke Arikok.
Pa mas di 7 aña caba Parke Arikok ta organisa su Nochi di Pelicula pa concientisa y educa e
comunidad di Aruba riba diferente topico global relaciona cu conservacion di naturalesa.
Diasabra 28 di september pa 7.30 PM lo pasa e dos ultimo episodio di e documentario “Our
Planet” cu a gana un Emmy pa e mihor documentario di 2019.
E dos episodionan cu lo wordo presenta ta basa riba e importancia di awa fresco y selva pa e ecologia. Sin awa fresco bida riba tera no lo existi y esaki ta e recurso mas valioso cu e planeta aki tin. Cada gota ta vital pa tur especie y nos como ser humano ta depende di dje. E aire cu nos ta respira, e awa cu nos ta bebe tur ta origina for di proceso controla pa mata. Mundialmente hopi selva ta wordo rosa pa diferente rason, pero nan por recupera bek si nos brinda nan e oportunidad. FPNA ta extende un invitacion na e comunidad di Aruba pa asisti na e Nochi di Pelicula na nos Centro di Bishitante y asina aprecia nos naturalesa y sinti inspira pa yuda na conserva esaki. E Nochi di Pelicula ta completamente gratis cu posibildad pa cumpra algo di come y di bebe. Pa mas informacion por yama na 585 1234 of bishita nos pagina di facebook; https://www.facebook.com/arikoknationalpark
