Diabierna ultimo Centro di Rescate y Cordinacion di Wardacosta a ricibi un notificacion via VHF canal 16, di un boto cu tabatin problema. E capitan a notifica cu su boto di piscado tabata tin problema y cu e no por a sigui nabega. RCC mes ora a informa steunpunt Aruba, ya
asina por a sali cu e Metal Shark, cu a bay na localidad di e boto Mishaili.
Una bes cu a yega na e localidat di e boto, e boto patruyero Metal Shark di Wardacosta a touw e boto y a nabega den direccion di Pier na Bali, caminda Mishaili por a mara cu siguridad. Na yegada na Pier na Bali e agentenan di Wardacosta a eherse un control rutinario riba e boto di piscado.
Ayera tambe RCC a ricibi un notificacion di e boto piscado Joandra, cu tabatin problema cu su baterianan. Un Metal Shark a bay nabega banda di Joandra, a touw esaki y nabega den direccion di Spaanslagoen Rancho Carion. Na yegada na Rancho Carion e agentenan di Wardacosta a eherse un control rutinario riba e boto di piscado.
Wardacosta ta avisa e doñonan di boto pa haci mantencion regular na nan botonan. Pa nan propio siguridad, abordo mester tin: sufisiente life vest, un flashlight cu bateria y un pito, un EHBO kit, sufisiente awa, aparato pa paga candela, VHF radio of un celular ful ge-charge. Evita e chens di un accidente of situacion peligroso riba lama cu bo boto of seadoo. Den caso cu mester di ayudo, por yama Wardacosta riba 913 of e whatsapp number 005999 510 0913. Gosa di lama y e beachnan na un manera safe.
