Reconoce un persona pa su esfuerso ta motiv’e mas pa sigui hasi mas cos positivo pa comunidad y su pais. Esaki ta den tur aspecto. Awe esaki ta locual netamente a sosode.
Un hoben productor, Darrel Koolman, for a algun aña ta ocupa su mes cultivando varios producto. Semper a bin ta haci esaki den prome instante como hobby y despues a tume mas na serio y converti esaki den su negoshi. El a hereda e pasion y gana for di su kerido tata cu semper a gusta planta. Awendia Darrel Koolman tin Koolman Family Farm. Despues di a inverti y expande e terenonan cu e tin cu mas variedad di producto a cuminsa filtra kico ta mas efeciente y gusta, cu e por ofrece na su clientela.
Asina Darrel Koolman a continua cu su cultivonan, cu na e momentonan aki e ta ofrece lechuga, arugula, carrot, tomati, concomber, spinashi, mint, boonchi largo, mango, sorsaka y kale. Tur esaki for di su propio cultivo. Ta depende tin biaha e cosecha, cu e por tin na e momento ey.
Na momento cu Departamento di Agricultura, Cria y Pesca Santa Rosa a aserca Koolman Family Farm, pa medio di Darrel Koolman, pa duna cooperacion di kico tur ta produci y kico por ta e obstaculonan cu e por a experencia. Kico su cliente ta exigi como demanda y con e por yuda cu informacion pa Santa Rosa por mehora y/of crea posiblidad nobo pa duna mas na nos productornan local. Darrel semper a coopera cu esaki sin duda alguno. Mensualmente Darrel ta haci esaki pa asina por tin un idea kico ainda falta y duna Gorbieno di Aruba un bista di nos Sector Primario y con por mehora.
Esaki den tur aspecto di manera e.o mas insentivo, impuesto, producto, servicio y si por crea mas beneficio pa nos productornan local, pero e principal ta keda, kico por ta e posiblidadnan nobo riba tereno di sector primario pa pais Aruba.
Awe mainta den un caravana chikito acompaña pa Ursell Arends, minister encarga cu Sector Primario, hunto cu director Nathalie Maduro, a yega di sorpresa na cas di Darrel Koolman pa asina haci entrega di e reconocimento. Net Darrel tabata ocupa den cunuco ta haci algun trabou.
Minister Arends a haya un splicacion breve di tur locual ta hasi y cultiva na Koolman Family Farm. Despues di esaki a haci entrega di su plakkaat di reconocimento como Hoben Productor di Aña 2021. Tambe pa su aporta y dedicacion na Secor Primario. E entreg’e su certificado di reconocimento como Amigo di Santa Rosa for di man di minister Ursell Arends. Tabata un rato masha ameno y hopi contento di parti famia Koolman cu e gesto bunita aki. Masha pabien na Darrel y sigui cu e mesun dedicacion engrandeciendo y fortificando Sector Primario di Aruba.
