Bo pensamento ta e parti esencial di bo integridad, pasobra ta dificil pa un hende ta integro, si den su curazon e ta formula tur tipo di maldad, si bo pensamento ta puro, bo actitud tambe ta puro, locual bo curazon ta yena cune, bo boca ta testifica.
Rey David a bisa den Salmo 66 vers 18 : Si mi a warda maldad den mi curazon , Senor lo no a tendemi.
Ta dicifil pa Dios tende bo ora bo curazon tin maldad aden of bo ta biba den pica, of bo ta planea maldad pa haci cu hende, bo ta hari constant, pero den bo curazon tin scuridad, pa falta di temor di Dios.
Ora bo ta mantene un pensamento malo asina, integridad ta huy for di bo, pasobra integridad no ta solamente bo hecho nan , pero bo integridad ta manifesta ora bo mente ta sano y ta agrada Dios.
Salmo 119 vers11 ta bisa : Bo palabra mi a sconde den mi curazon pa mi no peca contra bo. Nos mester haci hopi oracion y instrui nos yuinan pa haci oracion pa asina maldad no domina nan curazon. Un hende cu no conoce Dios, of ta haci cherche di Dios, ta hopi facil pa maldad domina su curazon, pasobra caminda tin orguyo y arogancia, amargura, y envidia, tin tur sorto di maldad.
Hopi hende ta puntra nan mes ta di unda tanto maldad ta bini, antes no tabata asina ,tabatin mas respet, hopi mas decencia y hopi mas trankilidad.( 2 Timoteo 3: 1-9)
Bijbel ta splica nos cu nos lucha no ta contra carni y sanger pero contra gobernantenan , contra e podernan, contra e forsanan mundial di e scuridad aki, contra e forsanan spiritual di maldad den lugarnan celestial.
Locual nos hubentud ta enfrenta awendia nos tur sa cu si nos uni berdaderamente den oracion, nos por vence, pasobra di berdad tempo ta trabahoso, pero tur cos ta posibel pa esnan cu ta kere, pasobra e palabra di Dios ta bisa cu si nos yama, Dios ta contesta.(2 Cronicas 7:14+15).
Ora mal pensamento presenta e mester wordo blokia cu oracion y ayuno, pasobra e oracion ta tumba e presencia di e maligno, pesey bijbel ta bisa nos den Santiago capitulo 4 vers 7 : Pesey somete boso mes na Dios resisti e diabel y e lo huy for di boso. Con nos por resisti e diabel ? Cu arepentimento, aparta for di pica, biba den e boluntad di Dios, den obedencia completo na Dios Su Palabra.
Pero asina nos curazon ta yena cu maldad, cu mal pensamento cu orguyo y arogancia, e enemigo ta tuma control di nos mente, y nos ta cana den scuridad, pasobra e hende cu mente carnal yena cu rabia cu odio no por agrada Dios.(Romanonan 8:7+8). Dios libra nos di tur e hecho nan di carni cu ta para scirbi den Galationan capitulo 5 vers 19-21 pasobra ta para scirbi cu esnan cu ta biba asina lo no hereda e reino di Dios. Hopi hende ta keha di depression y stress, pero mal pensamento of pensamento impuro, ta cansa bo mente pa bo destrui bo bida,pesey Filipensenan 4: 8 ta mustra tur locual mester ocupa bo mente .
Romanonan capitulo 12 vers 2 ta bisa: No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios. Pastor Marcel Balootje.
