CEDE Aruba den luna di augustus a organisa e fundraising di Happy to Give Back cu tabata un radio- y telethon. E campaña di Happy to Give Back a cuminsa na april y a recauda fondo pa tres meta.
E prome meta ta pa Fundacion Pa Nos Comunidad sigui yuda cu paketenan di comestibel, e di dos ta pa Ban Uni Man pa Cria nos muchanan cu ta e programa di breakfast na scol, y e di tres ta e programa di meals on wheel di YMCA. Daniel Tecklenborg, director di CEDE Aruba a bisa cu durante luna di augustus nan a enfoca hopi riba comunidad local. Nan ta contento di por a surpasa masha hopi mes.
Durante e radio- y teleton tabatin e meta pa yega 150 mil florin, pero a surpasa esaki y a yega na mas di 250 mil florin. A conta tur cos hunto y Happy to Give Back a surpasa e suma di 970 mil florin pa yuda famianan. E resultado aki ta algo cu nan mes nunca a yega di mira y durante e siguiente tres lunanan te fin di aña lo sigui recauda fondo, pasobra tin mas di diesdos mil famia registra na varios instancia.
Elton Arends, di team Happy to Give Back ta gradici tur participante pa por a haci e radio- y telethon un exito pa 48 ora for di Caya Grandi. E evento tabata special, pero tambe bunita di a mira radionan bini hunto cu e planta nacional pa haci un evento pa duna bek na tur esnan den necesidad. E suma logra a surpasa tur nan expectativa.
