Ta for di algun tempo caba cu e compania Brightline a cuminsa cu construccion di un pista di trein den Florida. Apart di e compania Tri-Rail, Miami ta conoce e compania Brightline, cu su treinnan mas luhoso cu por move di un parti pa otro den Florida. Actualmente por move for di e stacion di Brightline na Miami pa Fort Lauderdale, West Palm Beach y pronto pa Orlando.
E prome test for di Miami pa Orlando a bay bon. A conduci e test sin ningun pasahero abordo. E proyecto aki a genera mas di 1300 trabou directo y a inverti mas di 2700 miyon dollar pa por concretisa e ruta nobo aki, esta Orlando.
For di West Palm Beach pa Orlando, tin un duracion di dos ora den trein. Claro, mescos cu avion, bo tin cu reserva bo ticket online. Tin dos opcion, por ehempel di Miami pa Fort Lauderdale, por scoge un opcion mas barata di $17 of pa un clase mas luhoso pa $27.
E trein tin un capacidad di 450 pa 500 pasahero pa e ruta di Miami pa Orlando. Cuanto lo costa biahe aki, ainda no ta conoci. Lo inaugura e prome trip oficial na januari 2023. A indica tambe cu por spera mas ruta den futuro, entre otro pa Disney Springs, pa aeropuerto internacional di Orlando y hasta Tampa.
E hecho ta cu; e ta mas barata awo pa yega Orlando. En bes di bay cu avion, por bay den trein na un prijs mucho mas atractivo. E no ta un secreto cu Orlando ta un destinacion faborito pa nos hendenan local. Actualmente no tin vuelo directo pa Orlando, tin cu biaha pa Miami.
For di Miami sea ta core tres ora y mey den auto of ta bay cu avion. Pa juli, Southwest ta cuminsa cu vuelo directo for di Aruba pa Orlando tambe. Pues, awo lo tin mas opcion compara cu antes.
