Durante cu e Famia Real tabata na Aruba, e famia Afghano a presenta na Bestuurskantoor unda cu nan tabata warda riba S.M. Rey Willem-Alexander pa nan a haci entrega di un manifiesto. Nan intencion tabata ta pa e rey yudanan haya asilo na Aruba.
Durante un conferencia di prensa di Prome minister, a puntr’e si e tabata na altura di e protesta, pa cual el a bisa cu e no tabata sa di esaki. Si e ta na altura cu tin un famia Afghano pega na Aruba, nan tin asilo. Gobierno di Aruba a haci nan maximo esfuerso pa yuda e famia aki. Actualmente ta wardando riba nan pa cu finalisa nan documentonan.
Contrario na loke e famia Afghano aki a declara na prensa, e famia si tin asilo, di loke nos redaccion por a compronde for di Prome minister.
Mas aleu, Prome Minister, mr. Evelyn Wever-Croes a informa cu siman pasa cu e funcionarionan di Nacionnan Uni tabata na Aruba, a trata esaki tambe cu nan y nan lo yuda Aruba den e proceso aki.
CON NAN A YEGA ARUBA
Tabata dia 25 februari 2020, cu e famia Afghano aki, cu tabata consisti di seis persona, a drenta como turista Aruba SIN cu nan tabata tin e visa necesario, bou di e pretexto cu nan tabata di transito. Pero aki ta caminda cu autoridad mes a faya, door di laga nan tur seis pasa.
Tabata despues di un paar di dia cu polis a bin topa e hendenan aki ta cana den Wilhelminastraat. Nan tabata mustra desorienta. Ora cu polis a acercanan, a resulta di algo masha dificil, ya cu e hendenan aki no ta papia ingles, hulandes ni spaño. A resulta cu nan a “perde” nan paspoort. Pero pa haci e situacion mas complica, e cinco adultonan na Warda di Polis a solicita pa asilo den forma oficial.
Pero entretanto, e famia di seis a bira famia di uno, door cu un di nan a fayece na november ultimo.
