Diasabra 14 di augustus, Prome Minister a duna un discurso na e studiantenan di Xavier University School of Medicine cu a gradua na unda cu el a curasha cada studiante pa haci tur esfuerso den nan biahe como profesional medico, pa ta un miho version di nan mes.
“Gradua ta un gran logro. Algun di boso mester a supera obstaculonan na caminda, pa despues, na momento cu boso tawata na punto pa crusa e liña di boso meta, e mundo a trastorna pa un pandemia global. Y esaki a haci boso papel den nos sociedad mas visibel cu cualkier otro momento di historia moderno. Esaki ta un momento importante den boso carera. Boso a yega asina leu pasobra boso tawata comprometi cu medicina. Boso ta comprometi pa ta e heroenan cu comunidadnan asina tanto tin mester awo mas cu nunca. Pero e compromiso aki no ta tur cos. Bira un dokter kiermen entrega un parti di boso mes na otro ser humano. Pa haci esaki, boso mester haci tur esfuerso pa tur dia ta e miho version di boso mes”.
Bisando esaki, Prome Minister den su discurso, a comparti 3 pensamento cu nan cu a yud’e bira e miho version di su mes cu e speransa cu esakinan por inspira cada studiante den e siguiente fase di nan biahe pa bira e miho version di nan mes.
Prome, bo trabou lo yena gran parti di bo bida y e unico manera pa ta satisfecho di berdad y haci un excelente trabou, ta pa haci loke bo ta kere den dje. Pa haci esaki ta importante pa haci loke bo ta stima y stima loke bo ta haci.
Di dos, lidera cu empatia. E avancenan tecnologico y cientifico ta hibando e veld di medicina na alturanan nobo y esaki ta ‘great’. Pero manera tur otro profesion, medicina ta trata di ser humano. E aspecto humano di medicina ta loke ta conecta. Sea un lider of dokter cu empatia, ta nifica pa tin un interes genuino pa e bida y sentimento di pashentnan. Asina nos ta conecta y crea un sentimento cu nos ta forma parti di e bienestar di un comunidad.
Di tres, sea bo ta realisa of no, door di tuma un profesion den medicina of cuido di salud, bo a pone bo mes bou vigilancia; boso ta e guardiannan di nos planeta y di humanidad. Esaki ta un yamada special. Nos tur a siña cu circunstancianan por cambia di nochi pa mainta. Lo tin momentonan bon y lo tin momentonan dificil mientras boso carera ta avansa. Mantene bo enfoke y nunca lubida e rason pa cua boso a cuminsa e reto aki.
Prome Minister a finalisa su discurso felicitando tur studiante cu a gradua di Xavier University School of Medicine y ta desea nan exito den nan biahe como profesional medico, pa ta un miho version di nan mes.
