Diaranson 4 di november prome minister Evelyn Wever-Croes a tene un bishita di trabou na Directie Infrastructuur en Planning (DIP) y conhuntamente cu director di e departamento sr. Haime Croes, a pasa bishita e diferente seccionnan y gradici nan pa nan labor.
DIP ta un departamento cu pa hopi aña (bou di maneho di diferente Minister; Sevinger, Oduber, Lopez-Tromp) a cuestiona integridad di e departamento. Den cuadro di esaki tin algun cos cu a bay malo y tin algun hende/empleado cu a coopera cu e cosnan cu a bay malo. Sinembargo loke cu a bay malo no ta den man di e mayoria di empleadonan di DIP, cual ta hendenan cu ta traha duro cu dedicacion na hiba Pais Aruba dilanti.
A depolitisa e proceso di otorgamento di tereno
Un paso hopi importante cu a tuma ta cu personalmente y simbolicamente prome minister a traspasa e autoridad di firmamento di acta for di minister pa e departamento. A depolitisa e proceso di otorgamento di tereno y esey kiermen cu di awor en adelante, terenonan cu wordo firma ta wordo firma na e departamento door di e director y un otro persona cu e principio di cuatro wowo. Pues dos hende ta revisa tur cos. Haciendo esaki, e chens pa cosnan bay robes ta hopi menos. Y lo no por tin metemento politico mas. Metemento politico por cierto ta entre e topico di investigacion di caso avestruz y caso flamingo. Cu e traspaso di autoridad aki lo no por tin casonan di corupcion mas cu metemento di Ministernan. Esaki ta algo cu comunidad Arubano merece, sra. Evelyn Wever – Croes a accentua.
Un otro beneficio ta cu: Ta acelera desaroyo economico pa motibo cu hopi desaroyo economico ta depende di otorgamento di tereno y lamentablemente esaki tabata tranca na bureau di ex Minister. Tabatin mas di 500 acta di personanan cla pa construi cas y/of planta, pero e acta no tabata wordo firma pa nan haya e tereno. Aworaki e proceso lo wordo agilisa pa cada persona por haya nan tereno.
Tur ciudadano tin derecho pa haya tereno
Cualkier ciudadano di Pais Aruba cu tin deseo pa construi un cas, tin derecho pa haya tereno pa construi nan cas y mescos ta conta pa esnan cu tin deseo pa ricibi un pida tereno huurgrond pa por planta. Pa locual ta trata terenonan comercial, prome cu e firma tuma luga na e departamento, lo consulta pa mira si e ta pas den e vision di Gobierno.
“Esaki ta un stap grandi den kibra cu corupcion den gobernacion, pasobra Aruba a mira un era desde ex Minister Sevinger cu hopi corupcion caminda cu el a cambia proceduranan pa e tin autoridad. Awor a caba cu esey y pues ta e prome paso pa garantisa henter pueblo di Aruba cu e corupcion cu a conoce (den caso avestruz, flamingo y tal ves pauwies) awor a caba y cu ta trahando cu integridad pa Aruba.
