Prome Minister Evelyn Wever-Croes den nomber di Gobierno di Aruba ta gradici tur frontliners cu cada dia durante di e pandemia a demostra cu nan ta pone interes y salud di otronan prome cu di nan mes. Specialmente tur cu ta traha den cuido, tur esunnan cu ta traha cu Directie Volksgezondheid (DVG), personal di crisisteam, Dienst Besmettelijke Ziekten (DBZ) y tambe esnan cu ta encarga cu siguridad di nos Pais y fronteranan.
Prome Minister ta lamenta di mira cu oponentenan ta ataca profesionalnan di cuido
Aruba su Frontliners ta consisti di personanan trahando incansablemente cu cifranan enormemente halto y cu presion di trabou cu ningun pais di e tamaño di Aruba tabata prepara pe.
‘Laga nos para keto y laga nos diferencianan di opinion un banda. Ban reconoce cu nos profesionalnan den cuido ta entre e mihonan cu tin na mundo.
Nos a atende cu e crisis na bon forma y lo sigui atende di bon forma tambe.’
Prome Minister a sigui bisa cu no ta tur hende ta contento cu decisionnan cu tuma, pero ta importante pa sa cu ta tuma decision basa riba e mihor consehonan y mihor analisis na bienestar y salud di cada un persona.
Por ultimo Prome Minister ta termina gradiciendo cada ciudadano di pais Aruba pa e cooperacion y ta enfatisa pa cada persona cuida nan mes y nan famia. ‘Hacie paso bo ta stima Aruba.’
