Sea ex-minister Otmar Oduber ta inocente of e ta culpabel, esey ta un hues so por determina, pero e forma con Ministerio Publico ta tratand’e y tratando e caso ta un asunto nunca bisto y un berdadero berguensa nacional pa henter nos aparato hudicial. Un caso asina “high profile” hamas por ta den man di un fiscal asina hoben, Thomas Rethmeier, sin tanto experencia pa por cera un ex-Vice Minister Presidente di un pais.
Conocedonan di ley a splica cu locual hues mr. R. van Vuure di Corsou a skirbi den su decision, ta un “brevet van onvermogen” pa henter Ministerio Publico di Aruba. E hues ta bisando nan cu bo no por manda mi dos pida acusacion fofo y sin e demas declaracion di otro sospechosonan, purbando pa prolonga un acusado manera Otmar Oduber. Cu su rason e hues a bisa fiscal cu su caso ta suak y cu loke tin awo riba mesa, e no ta mira con lo bin castigo mes pa e ex-mandatario.
Abogadonan a enfatisa cu aki tin tres scenario posibel. E prome ta cu fiscal a drumi dos aña riba e caso y no a logra mucho. Y awo ta cu man bashi yegando corte, buscando awo pa yega na evidencia pa toch “scapa cara” di husticia di nos pais. E scenario ey ta esun mesun probabel pero no imposibel. E di dos scenario, esun cu mas hurista ta kere cu a sosode, cu fiscal a traha “slordig” y a djis hisa benta manda algo sin mir’e bon y cu confiansa cu “hues lo duna nos rason toch”, ya cu ta un procedura normal esaki di pidi prolongacion y manda un detenido pa KIA.
E di tres scenario ta cu fiscal no ta cla cu su caso y no kier pa abogadonan di e sospechosonan tin acceso ainda na e “zaak dossier” y como tal a manda un parti masha chikito so pa hues-comisario mira. E sa cu si e manda henter e “dossier”, cu mesora e otro abogadonan tambe ta mira kico precies tin contra tur e sospechosonan envolvi. Pensando cu e no kier saca tur cos ainda y keda cu e factor sorpresa te ora yega dilanti corte mes otro aña, a opta pa djis manda algo y den e proceso ey “el tiro le salio por la culata”.
Pa e relato completo, lesa TREMPAN
