Diamars anochi alrededor di 9:30 pm polis a presenta den Paradijswijk p’un problema di pareha. Na prome instancia a ricibi informacion cu un homber lo ta agrediendo su pareha den e parke di recreacion. Ta motibo suficiente pa polis mara trot y yega un poco mas lihe. Na nan yegada a topa cu slof riba caminda, e hende homber pa un banda y e hende muhe otro banda.
Un tabata grita otro formal riba caya. Polis a cuminsa na introduci nan mes y separa nan for di otro. For di e hende muhe a compronde cu e ta cansa di e homber. El a comenta cu e homber no ta sirbi pa nada. E no ta cushina, no ta laba paña, no ta cria e yiu, tampoco ta saca e cacho pa por haci su necesidadnan, en fin un monton di motibo pa hustifica cu e homber no ta sirbi.
E ta sinti cu e homber ta percura pa su mes y su beyesa prome cu su yiu, cacho y pareha. Bou lagrima polis a scucha cu masha pasenshi su dolor. Di otro banda, e homber trankil di su mes a conta e otro agente su perspectiva. E ta sinti cu parcialmente su pareha tin rason, pero e no por deal cu hende cu ta blo keda grit’e henter dia.
Pa es motibo el sali fo’i cas y bay relax mente un rato den parke. Polis a splica nan cu aki ta trata di un problema social no algo pa polis. Asina mes a bay mas leu di purba intermedia y trece paz, maske ta temporalmente. Na final ambos a sigui nan caminda y a conseha nan pa busca yudansa profesional, aunke kisas e miho solucion lo ta pa termina e relacion y tur hende sigui nan rumbo.
