Durante conferencia di prensa di Gobierno, Prome Minister Evelyn Wever-Croes a anuncia cu Arubahuis lo tin un director nobo pa comienso di december 2023. Pa cu e posicion aki, a cuminsa un proceso di nombracion na juni 2022, cu a culmina na november 2023, den un decision na fabor di mr. Joselin Croes.
Manera ta conoci, Arubahuis ta representacion di Aruba, na Hulanda y e mision di Gobierno pa Arubahuis ta pa tin un Aruba visibel na Hulanda, den Reino y na Europa. Pa logra esaki e meta aki, Aruba tin su Minister Plenipotenciario, mr. Juan “Ady” Thijsen y awor un director nobo, mr. Joseline Croes.
Prome Minister a splica cu e nombramento di Joselin Croes tabata un vacatura publica na juni 2022. Gabinete Wever-Croes basa riba integridad, a tuma e decision di no haci e nombracion aki uno politico, manera añanan anterior, sino a habri e vacatura pa diferente candidatonan por solicita, ya cu pa sirbi e vision y mision di Arubahuis miho, ta necesario pa tin un persona eynan independiente di cua Gobierno ta sinta.
Pa cu e proceso di nombracion, Gobierno a introduci un comision cu tabata encarga cu e proceso aki, cu tabata consisti di Departamento di Recurso Humano, Departamento di Impuesto y un representante di Ministerio di Asuntonan General.
Un total di 23 persona a solicita y basa riba e criterianan, a scoge tres candidato, cu a bay door di un entrevista, unda a scoge Joselin Croes como e miho candidato pa e posicion aki.
Na oktober 2022, e comision a acerca Prome Minister, cu ta encarga cu Arubahuis, pa presenta e proposicion aki y na februari 2023, Conseho di Minister a aproba e proposicion aki. Despues di esaki, a haci algun investigacion mas, incluyendo esun di Veiligheidsdienst, cual tambe a sali positivo.
Prome Minister a splica cu Joselin Croes ta actualmente e Minister Plenipotenciario pa Aruba na Washington. Durante e ultimo cinco añanan, Croes a traha hopi duro riba promove y crea oportunidadnan pa Aruba y pa Arubianonan, cu partnernan na Merca. Specialmente riba tereno economico, innovacion, cultural, enseñansa y tambe area diplomatico. Un di e metanan principal di Joselin Croes tabata pa Aruba fortifica lasonan cu Merca y Canada y pa saca mas probecho posibel di esaki.
Joselin Croes, prome cu su funcion na Washington, tabata Chief of Staff di Minister di Husticia y prome cu esey e tabatin su propio oficina di abogado.
Aparte di ta abogado e tin aworaki tambe su Masters Degree den Environmental Management. Croes ta conoci pa su determinacion, positivismo, pasion y disciplina pa logra su metanan. E ta domina 4 idioma y tin e curiosidad pa siña mas idioma y cultura di otro paisnan.
“Mi ta desea Joselin Croes hopi exito, den e funcion nobo aki, cu e lo cuminsa na december proximo. Tambe mi kier gradici Glenda Hernandes cu a tuma e encargo di director interino pa un periodo mas largo di loke nos a pidie na comienso. Señora Hernandes a sa di trece stabilidad y trankilidad na Arubahuis y pa esaki, nos ta gradicie. Cu nombracion di e director nobo, Arubahuis ta laga un periodo dificil atras y ta sigui cu positivismo padilanti. Di mi curason un danki na tur empleado y staff completo di Arubahuis pa tur nan esfuerso y dedicacion” asina Prome Minister a expresa.
