Diabierna di 10 december ultimo, Comision Interdepartamental di Derecho Humano y Universidad di Aruba a bin hunto pa conmemora e di 73 aniversario di e Declaracion Universal di Derecho Humano. Invitadonan tabata miembronan di e comision di Derecho Humano y tambe studiantenan di Universidad di Aruba.
E decano di e Facultad di Ley di Universidad di Aruba, Dr. Ruth Bonevalle, a habri e mainta. El a yama tur presente un bon bini y a enfatisa e trabounan importante cu Universidad di Aruba a bin ta haciendo pa varios aña caba pa locual ta trata Derechonan Humano. Despues, e presidente di e Comision di Derecho Humano di Aruba, cu ta representa Departamento di Relacionnan Exterior, mr. Olivia Trimon-Croes, a duna un splicacion tocante e tareanan y trabounan cu e Comision ta eherce.
E mainta informativo a clausura cu un presentacion di dr. Desiree Helder, waarnemend Directeur di Oficina Central di Estadistica (CBS) na unda el a elabora riba e tema central di Nacionnan Uni pa 2021, esta Igualdad, Inclusion y No-Discriminacion. Durante di e presentacion a haci uzo di entre otro datonan colecta durante Censo 2020. Durante e mainta informativo, e Comision di Derecho Humano y Universidad di Aruba a expresa e deseo pa estrecha e lazonan di cooperacion na bienestar di comunidad di Aruba. Un danki special na dr. Benedicta Deogracias di Universidad di Aruba cu a yuda organisa e evento aki y tambe a fungi como e moderador.
