Desde oranan di merdia cu e noticia a bira conoci cu ehecutivonan di CITGO di Houston ta deteni y encarcela na Caracas, Venezuela, mesora aki na Aruba a nota un preocupacion grandi bou di esunnan cerca di e proyecto. Por lo menos dos di e sospechosonan tabata sea traha na Aruba of ta frecuenta nos isla masha.
Di fuentenan bon na altura, ya caba Refineria di Aruba a yama un reunion cu caracter di urgencia pa por midi e menasa cu e accion aki por tin pa nos isla. Manera ta conoci, desde dia 1 di october 2016 ta existi Refineria di Aruba N.V. cu ta doño di tur facilidad y ta supervisa e maneho di CITGO cu a “lease” e operacion for di nan. Ya caba ta conoci cu e proyecto conoce tardansa y ta teme cu si a start un investigacion di e magnitud aki, cu e tardansa por ta mas grandi ainda, cu tur consecuencia pa e proyeccionnan economico cu pais Aruba a anticipa.
For di Refineria di Aruba tambe ta reina un silencio hermetico riba e situacion di ultimo ora aki tambe. For di fuentenan nos a compronde cu nan mes ta tumando nota di e situacion y pa averigua kico ta berdad y kico no.
