Pos Chikito ta keda vulnerabel durante temporada di awasero. Y awe no ta un excepcion. Personal di DOW y tambe City Inspector tabata tey presente, pa asina contene e situacion.
Segun City Inspector Danilo Prescott, na varios caminda nan a topa cu personal di DOW y tambe hopi acumulacion di awa. Pos Chikito ta un luga strategico cu personal di DOW sa cu awa ta keda pega y pa e motibo aki a bin cu nan slang pa asina cuminsa pomp e awa.
Den e otro barionan tambe tin acumulacion di awa, cu ta stroba trafico. Prescott a splica cu na Piedra Plat, na altura di e veld di bala, tambe awa ta manera medio pega.
Den Franse Pas tambe tin acumulacion di awa. Den otro palabra, Aruba henter ta bao di awa.
Fluho di awa
E molester di awa na Pos Chikito ta hopi fastioso. Por a mira e caminda, e awa ta yega na rand di e caminda, y ta bay te den e area di supermercado Rei Hing. DOW a cuminsa na chica e awa bay otro banda, pa asina e awa por bay lama.
E awa cu a wordo traha ta stroba e fluho di awa. Ya caba por a mira cu a activa e pomp pa por chica e awa.
DOW ta recore den varios bario unda cu ta conoci di tin molester di awa. Nan ta tuma e medidanan preventivo pa asina saca e awa, pa asina si e awasero sigui yobe, e no sigui acumula.
