Manera a palabra anteriormente, Minister Ursell Arends, sali y bin encontra cu e trahadonan malcontento. SEPPA, na nomber di e trahadonan di Arubus a entrega e carta n’e mandatario, describiendo e lucha di e trahadonan pa un salario husto y digno. Ta pidi e mandatario pa pone mas fondo necesario, pa por yega na un acuerdo, cu por calma e situacion pero cu ta permiti nan di sigui brinda e servicio di calidad y tambe eficiente.
E situacion cu nan ta aden ta imposibel pa sigui labora den un ambiente trankilo, ya cu tin hopi frustracion y demotivacion pa e temanan aki. Magaly Brito a indica na e minister, pa den 2x24ora, nan ricibi un contesta positivo. Si pa diabierna atardi, no yega na un solucion, e trahadonan lo escala e welga.
E mandatario a dirigi un carta na mediador di gobierno y tambe na e sindicato, unda cu ta bisa cu e tema ta un discusion cu mester wordo hiba cu e mediador. Pero si gobierno no pone e fondonan necesario, ta imposibel pa yega na un acuerdo.
Y si no yega na un solucion, e trahadonan lo sigui welga, lo sigui riba caya den e lucha pa un miho salario y un bida digno.
E mandatario ta lamenta cu e trahadonan mester yega na Cas di Gobernacion pa manifesta nan disgusto, pero como gobernante e tambe ta disgusta. Segun Arends, politica y gobernantenan a conduci cu Arubus ta awe unda cu e ta, un compania practicamente bancarota. CAft, Algemene Rekenkamer y PWC, tur ta confirma esaki.
Awo ta para na un momento crucial: Sea ta bay den direccion cu e exigencianan cu kisas no ta factibel aworaki of ta bay traha hunto cu e trahadonan pa haci e compania factibel un biaha mas. Como minister semper el a traha banda di e trahadonan, pa rescata e compania. Pero el a subraya cu gerencia ta incapaz y cu el a faya e trahadonan y tambe gobierno di Aruba.
E mandatario a sigura cu e Raad van Commisaris lo haya un carta pa bin c’un plan structural di un reorganisacion completo di e compania, hunto cu e trahadonan y di e manera cuminsa traha pa rescata e compania. El a duna te cu fin di luna pa nan bin cu un plan structural cu e fondonan pa e compania.
Magaly Brito, di SEPPA a pidi e minister pa, den cuadro di e peticion entrega, nan kier un contesta hopi rapido pa asina e trahadonan sa unda nan ta para y kico nan por spera y e mandatario a priminti cu awe mes nan lo haya un contesta riba esaki.
