Den un reciente entrevista, abogado mr. David Kock a revela e detayenan di e expansion di su bufete pa Hulanda, destacando e importancia di no tin miedo pa dal paso grandi. Kock a menciona cu, despues di a establece exitosamente na Merca y Colombia y cu un solido representacion na Aruba, e decision di expande pa Hulanda tabata un paso logico mirando su vision y e oportunidadnan cu e mercado aki ta ofrece.
Un paso nobo den un mercado strategico
Kock a splica cu, durante hopi tempo nan a traha estrechamente cu un oficina na Hulanda, loke a facilita e transicion. “Semper nos a kere den mercado y posibilidadnan nobo, Dado e cantidad significativo di Antiano (Arubiano, Curasoleño, Boneriano, etc) y e cantidad di transicion comercial entre Aruba y Hulanda, esaki tabata un mercado logico, aunke un poco leu,” Kock a afirma. Fuera di esey, el a menciona cu su colaboracion cu Diaz-Reus di Miami, interesa den Hulanda, a actua como catalisator pa acelera e expansion aki.
Servicio integral pa un demanda creciente
E bufete di Kock ta ofrece un variedad completo di servicio legal, for di asunto personal pa penal. “Nos tin un exclente ekipo penal na Arubay un solido presencia na Barranquilla, Colombia. Tur esaki no lo tabata posibel sin e ekipo cu nos tin tanto na Aruba como na Colombia,” Kock a enfatisa. Tambe, el a subraya e similaridadnan entre e sistemanan legal di Hulanda y Aruba, loke a facilita e expansion.
Fortalecemento di vinculo comercial internacional
Durante e entrevista, a desta a e banderanan di Surnam, Hulanda, Aruba y Colombia, simbolisando e vinculonan comercial den crecemento. Kock a menciona reunion reciente cu e embahador di Colombia y otro dignatario, subrayando e necesidad di integra e mercadonan aki. “Nos kier uni tur e paisnan aki y nos ta sigur cu esey lo sosode,” Kock a bisa.
Recepcion y disponibilidad na Hulanda
Kock a expresa su satisfaccion p’e acogida caluroso ricibi n’e embahada di Colombia na Den Haag. “Nan a ricibi nos hopi bon. No tin duda di e comercio existente entre e dos paisnan aki. Cu un gran colonia Colo biano na Hulanda, ta prome biaha cu un bufete cu un background Colombiano a establece aki y nos ta sinti honra cu a ricibi nos asina calurosamente,” el a comenta.
Facilidad pa asistencia legal
Finalmente Kock a sigura cu su bufete ta plenamente operativo na Hulanda, cu abogado disponibel pa brinda asistencia legal na cualkier momento. “For di Aruba, semper nos ta cla pa guia nos clientenan y awo tambe nos tin un oficina aki cu abogado disponibel pa yuda. Asina ta, for di awo, pa cualkier necesidad na Hulanda, boso ta bonbini,” Kock a conclui.
