Diabierna a tuma luga pleidooi na Hoge Raad contra veredicto cu mester habri matrimonio pa pareha di mesun sexo, pleidooi di casacion cu Pais Aruba y Corsou a cuminsa.
Hester Wattendorff, vocero na Hoge Raad ta splica cu e procedura ta cu awor ambos partido tin e oportunidad pa reacciona por escrito riba nan posicion cual lo tuma luga dentro di dos siman, na Hulanda conoci manera Re- en dupliek.
Despues e caso ta bay over na Parket, cual ta un entidad autonomo, un parti independiente di e organisacion hudicial na Hoge Raad. Nan ta duna conseho na Hoge Raad tocante e decision cu mester tuma, encarga pa e Abogado General.”El a laga sa awe durante e tratamento di e caso cu su plan ta pa riba 19 di januari 2024 duna e conseho of conclusion aki.”Ambos partido lo haya e oportunidad pa reacciona riba e conclusion aki por escrito.
Nan ta haya dos siman di tempo pa haci esaki. Ora cu ambos partido presenta nan reaccion, e caso lo sigui na Hoge Raad, den e caso aki na Civiele Kamer pa bay over na dialoga y dicidi.”Esaki ta nifica cu rond di luna di maart lo por spera un sentencia. E dianan ey ta estableci na momento cu Abogado General ta tuma e conclusion riba 19 di januari, eynan lo determina un fecha pa sentencia,” segun Wattendorff.
E fecha cu lo determina pa duna sentencia ta uno tentativo segun Wattendorff pasobra no ta garantisa cu ta yega na e fecha poni. Dus e sentencia por bini hasta poco mas trempan, pero tambe un poco mas laat, segun Wattendorff ta indica.
