E ultimo dianan aki por nota un ambiente masha fertil pa eleccion. Oposicion porfin a cuminsa sali mas, mientras cu tanto partido MEP como RAIZ a cende nan makinaria di campaña y diariamente ta los proyecto y “bon noticia”, ademas ambos partido ta organisando rifa y otro forma pa recauda fondo. Esey mesora ta crea e percepcion cu mester ta preparando pa eleccion pasobra memey di gobernacion asina no sa organisa rifa!
Locual mas ta zonando ta un posibel partido politico nobo, esta partido PAIS. E nomber cu mas ta resonando ta di Otmar Oduber. Parce cu e ta purba di tur forma pa funda e partido den pura, pasobra si gobierno cay den e siguiente simannan, lo ta demasiado laat. Tin mas indicacion cu sea Gerlien Croes of Ryçond Santos do Nascimento tambe ta evalua pa funda un partido nobo. Aunke cu di ningun di tres no ta hayando confirmacion.
Grupo di cuater
Di acuerdo cu e fuentenan for di politica, e grupo lo por ta consisti di Otmar Oduber, Ryçond Santos do Nascimento, Gerlien Croes y Chris Romero. Ningun di nan a confirma nan participacion of posibel union pa forma un partido nobo. Pero echo ta, cu tur cuater ta sea agente liber of ta birando liber.
Gerlien Croes no a dicidi
E unico cu ainda no a tuma un decision final ta Gerlien Croes. E ultimo aki a yama un conferencia di prensa algun dia pasa caba bisando cu e ta disgusta y cu e lo papia cu su achterban pa dicidi ki direccion e lo tuma. Mescos cu Ryçond Santos, nan ta boga pa cambio den e forma di liderazgo di AVP. Pero como cu ainda Croes no a sali di AVP y a opta pa keda keto den Parlamento, ta laga porta habri pa tur tipo di speculacion. Ta mencionando su nomber tambe awo pa PAIS, aunke cu probablemente ta deseo.
Rycond Santos
Aunke e politico ta keto y a asumi su rol di Parlamentario Independiente, el a haya oferta di mas cu un partido politico. El a confirma di a haya oferta pero di no a acepta ningun. Hende yega na dje ta sigura cu esun di Partido MAS ta esun cu mas ta zonando den su horea.
Otmar ta bek!
Cu Otmar Oduber lo ta desea di bay bek den politica no ta asombra ningun hende. E ultimo conferencianan di prensa cu el a organisa, aunke pa papia di su caso penal, toch el a dedica hopi na politica. Y riba caya hopi ta papia cu e ta acercando ex-campañadonan caba pa formalisa un relacion nobo. Parce cu Ministerio Publico ta purbando pa “settle” cu ne. E mes lo desea di logra un daño y perhuicio di como tres miyon florin, debi cu a stroba su negoshinan y a kibra su carera politico. Si husticia lo pag’e pa dun’e acceso bek na fondo pa campaña ta algo pa mira awo. Parce cu husticia ta negociando cu mas “ex-sospechoso” den e caso Flamingo!
AVP tin problema interno
E echo cu partido AVP ta confrontando problemanan interno serio, tambe ta yuda na crea un ambiente fertil pa partido nobo of movecion nobo. Di otro banda, nan opositor di mas grandi, MEP, kier probecha di e situacion cu AVP ta aden pa benta gobierno abou awo, purba kita voto di Raiz, pa asina logra mas asiento pa sea purba traha nan so…of logra mas minister di nan y mas parlamentario. Aworaki nan tin un coalicion di un mayoria limita, di 9 asiento di MEP y 2 di Raiz cu ta forma net 11 cu mester pa goberna. AVP mester caba di soluciona e problema cu e hala “hoben” prome sigui padilanti. Ta mustra cu si Gerlien Croes bandona AVP, cu e lo bay cu hopi.
AVP y MEP tin mesun problema
E reto cu ambos partido grandi y tradicionalista tin ta cu e pueblo votado a cambia. No tin compromiso mas manera antes. E generacion nobo no ta fiel na partido di papa y mama, nan kier cambio y desaroyo. Pues, si AVP tin pensa di bay cu e mesun lista “bieu” anto e resultado lo ta mesun cos. Dificilmente un votado cu no a vota pa AVP den 2021 lo vota awo pa e mesun candidato. Pero…esaki ta conta mescos pa MEP. Si e partido na mando, di cual tur candidato, menos Evelyn Wever y Endy Croes a bay dilanti, bolbe cu e mesun “team”, e resultado lo no ta diferente. Ta bon pa corda tur fanatico, cu na 2017 AVP a haya 23.385 voto y MEP a haya 22.078. Pues AVP a haya mas pero MEP a forma coalicion. Den eleccion di 2021, MEP a bolbe cay y a haya 20.701 voto mientras AVP a cay mas ainda y a haya 18.348 voto. Pues, MEP a haya mas berdad, pero cayendo den voto. E berdad ta cu e votonan di AVP y MEP a bay na Accion 21, MAS y Accion 21. Bisando esaki, si no bin cambio y reorganisacion, e resultado por ta desvastado den e siguiente eleccion. De facto den MEP, e unico minister cu tin algo pa “demostra” ta Dangui Oduber, pasobra turismo di berdad ta bayendo bon!
Tocante Gerlien Croes
Gerlien Luzdiane Croes a nace na Spijkenisse, Rotterdam, Hulanda dia 7 di februari 1987, loke ta nifica cu e tin 36 aña. E ta biba cu su pareha cu kende e tin dos yiu homber, Nate-Anton di 9 aña y Terrence di 7 aña. Na 2007 Croes a finalisa su studio VWO y na 2013 a gradua 2013 na Universidad di Maastricht Hulanda como Hurista den ley Internacional y ley Europeo y e ta posee e titulo di Meester in de Rechten. El a traha 2 aña den sector priva na Hulanda den e industria di gas y petroleo y na 2015 a bolbe bek Aruba cu su famia. Desde 2016 Gerlien ta fungi como Consehero di Maneho na Oficina di Relacionnan den Reino y Union Europeo. Na 2017 Gerlien a haci su entrada den politica como candidato di Partido AVP y ricibi sosten di 982 votado, mientras cu na eleccion di 25 di juni ultimo el a ricibi 1919 voto y asina bira e di dos votegetter di su partido. Pa di dos eleccion consecutivo, Gerlien ta posiciona su mes como di 3 hende muhe cu mas hopi voto na Aruba.
Tocante Ryçond Santos do Nascimento
mr. dr. Ryçond Raylond Santos do Nascimento a nace dia 5 di november 1978 na Aruba. E ta casa, tin cuater yiu y ta biba na Santa Cruz. El obtene su Master of Laws na Universidad di Aruba na december 2009, su doctorado for di Rijksuniversiteit Groningen na december 2016 y for di Universidad di Aruba na februari 2017. Na januari 2019 el ricibi su Academic Learning Certificate (ALC) cu ta ekivalente na un Basiskwalificatie Onderwijs (BKO). For di april 2017 e ta president di Fundacion Instituto Digna Lacle-Herrera y ta fundador di Nihil Credendum Research & Consultancy na 2018. Na 2021 el a lansa su mes como candidato, pa prome biaha, figurando como number 5 riba lista di AVP y obteniendo e confiansa di 214 votado.
Tocante Otmar Oduber
Na november 2017, Otmar Oduber a ocupa e puesto di Minister di Desaroyo Teritorial, Infrastructura y Integracion. E tabata e prome mandatario di pais Aruba cu a sinta tres termino sigui tras di otro, Gabinete Mike Eman I, Gabinete Mike Eman II y Gabinete Wever-Croes.
Otmar Oduber a aparece pa prome bes riba lista politico na aña 1997 cu Partido AVP y na december 2016 a funda su mesun partido, Pueblo Orguyoso y Respeta (POR). Den nan prome eleccion na aña 2017, combinando forsa entre Otmar Oduber (AVP), Marisol Lopez (MEP-AVP) y Andin Bikker (MEP-PDR), e partido di 29 candidato a logra 5531 voto.
Votonan individual:
Eleccion 1997 – AVP – 555 voto
Eleccion 2001 – AVP – 313 voto
Eleccion 2005 – AVP – 918 voto
Eleccion 2009 – AVP – 1647 voto
Eleccion 2013 – AVP – 4008 voto
Eleccion 2017 – POR – 1808 voto
Otmar Oduber ta naci na Aruba dia 7 di augustus 1972 y ta di tres yiu di Rudy y Clara Oduber. E ta tata di 4 yiu.
Tocante Chris Romero
Crispin Valentino Junior “Chris” Romero a nace na Aruba di 9 di maart 1976 y ta un politico Arubiano. Entre aña 2017 y 2021 el a eherce su funcion como minister di transporte, comunicacion y sector primario bou di Gabinete Wever-Croes I. Anteriormente e tabata miembro di Parlamento di Aruba. Chris Romero a nace na Aruba y a crece na San Nicolas. Despues di a termina su estudio na IPA el a eherce su funcion como docente na San Nicolas mes. Chris Romero a participa na eleccion prome biaha na aña 2005 y den su salida caba a logra no menos di 314 voto riba su nomber. El a sigui crece na 2009 y a haya 622 voto di sosten. Siendo den parlamento, el a cuminsa haya mas popularidad y asina den e eleccion na aña 2013, ora cu e tabata # 2 riba e lista di MEP, el a haya 1273 voto riba su nomber. Por mira pues cu den cada eleccion e tabata redobla su votonan. Pero den e ultimo eleccion na september 2017, el a bay atras y a baha na 1048 voto, cu ta representa un caida di 18%. Na 2017 a nombr’e como Minister di transporte, comunicacion y sector primario. Na 2021, despues di a participa na cuater eleccion, Chris Romero a dicidi pa tuma su retiro for di politica. Chris Romero ta tata di 3 yiu homber.
