Diasabra mainta, fo’i oranan trempan, polis di bario c’un team special a subi caya. A para riba Watty Vos Boulevard. Motibo ta pa nan controla. Polis ta haciendo un tipo di inventario riba tur vehiculo RHD.
Esaki ta pasobra cu hopi di e autonan aki ta core indocumenta of nan number no ta cuadra. Pero tambe ta huur hopi di nan. Den varios ocasion, hopi di e autonan aki ta uza nan pa haci cos robes.
Tambe e autonan aki ta huur e autonan aki cu hendenan stranhero, mas ainda, indocumenta. Hendenan cu no tin papel pa keda na Aruba.
Polis a haci control y ta haciendo inventario. Hasta tin biaha ta saca potret di e autonan aki p’asina tene esaki den nan inventario pa ora cu algo bay robes, nan por tin un bista mas of menos den ki direccion mester investiga y busca esunnan cu ta comete acto cu tipo di autonan asina.
Un control fructifero cu hasta comisario di polis Trudy Hassel tambe a presenta p’asina moralmente duna sosten na e team di polis cu tabata haciendo un tremendo control den oranan di mainta trempan riba Watty Vos Boulevard.
A confisca varios auto. Hopi di e autonan aki no tin papel. Hopi hende por a sigui cu nan auto si, pero a haya un multa pa falta di un of otro documento.
A detene como 10 persona indocumenta durante di e control cu nan tabatin. A hiba varios auto na warda di Balashi. Eynan nan lo keda pendiente investigacion p’e doño presenta.
Fuera di esey, esunnan deteni pa motibo di ta indocumenta, a hiba nan den diferente transporte pa warda di Oranjestad. Ey ta sigui proceso di control, pasobra hopi di e hendenan aki ta cana cu un documento di peticion pa asilo y tin di nan ta data for di 3 aña caba cu nan tin e documento aki.
Ya caba nan mester a haya un contesta cu a nenga nan e asilo. Nan no mester ta mas na Aruba. Tur esaki ta control cu ta tuma luga. Tin di bisa cu e controlnan aki lo sigui pasobra polis ta haciendo inventario riba mayoria di e auto RHD. Ta para nan riba caminda, ta controla documento y si ta hende documenta, ta bay cu nan warda pendiente investigacion y proceso, pa despues pasa nan pa Guarda nos Costa. Tabata un dia exitoso pa e team cu a lanta mainta trempan cu a haci e control riba auto RHD.
