E significadonan di e terminonan
Bou di un agencia di empleo, tambe conoci como uitzendbureau, nos ta compronde un oficina cu ta pone trahadornan den e disposicion di un otro, esta e inlener.
E inlener ta e compania of persona cu ta dirigi un empresa unda e trahador pa medio di e agencia di empleo ta wordo manda pa hasi su trabou, ehempelnan ta trabou di limpieza, waiter (art. 1 Landsverordening terbeschikkingstelling arbeidskrachten). Ta importante pa remarca cu e hefe di e trahado ta e agencia di empleo, y no e compania unda e trahado ta laborando. Enfasis mester wordo poni riba e hecho cu e relacion hefe y trahado ta esencial ora di determina ki derechonan y obligacion ta kai riba e hefe den respecto su trahado y vice versa. E relacion entre agencia di empleo y trahado ta codifica den seccion 11, titulo 10 di buki 7 di nos Codigo Civil.
E contract
E agencia di empleo tin un contract cu e trahado. E agencia di empleo tin tambe un otro contract cu e inlener. Cu otro palabra e trahado no tin un contract direct cu e inlener, solamente cu e agencia di empleo. Esaki ta crea un situacion di un relacion ‘triangular’ entre agencia di empleo, e trahado y e inlener. A base di e contractonan aki e agencia di empleo ta pone trahadornan den disposicion di e inlener pa asina e trahado hasi un trabou bou e supervision y instruccion di e inlener.
E situacion actual na Aruba
E balor agrega di e articulo ki ta basa den e hecho cu tin hopi hende na Aruba trahando via un agencia di empleo y nan no sa nan derechonan. Esaki tin como consecuencia cu hopi di nan, kizas mayoria, ta wordo abusa door di e agencia di empleo. Tin biaha e agencia di empleo mes no sa cu e ta abusando di e trahadonan, ya cu nan mes tampoco ta hasi un esfuerzo pa sa cua ta e leynan cu nan mester tene cuenta cune. Tin hopi persona tin añanan largo trahando, via agencia di empleo, pa e mesun inlener (compania) haciendo e mesun trabou. Esaki ta abuso di e trahado y contra nos leynan. No tin un motibo di peso pa hasi esaki pasobra e ta para den ley cu maximo cu un uitzendbureau ta permiti pa pone un trahado traha pa un inlener hasiendo e mesun trabou ta 12 luna. (Artikel 5 Landsverordening terbeschikkingstelling arbeidskrachten). Riba su mes esaki ta hopi na desventaha di e trahado door cu e tipo di trahado aki dificilmente por bini na remarca pa por ehempel un prestamo na banco pa un auto of cas ya cu e no tin trabou permanente.
Relevante ta e hecho cu e trahado mester wordo tuma directamente den servicio door di e inlener despues di 12 luna si e inlener kier pa e trahado specifico ey continua hasi e mesun trabou pe. Incumplimiento di e leynan door di e agencia di empleo por tin consecuencianan severo pa e oficina, entre otro perdida di nan permiso pa ta un agencia di empleo. Otro punto unda e trahadonan ta confronta hopi abuso ta relaciona cu nan salario. Un trahado tin den principio derecho riba un salario lo mas serca posibel na e salario di un trahado cu si ta den servicio directo di e compania (inlener) y bou mesun circunstancianan (artikel 8 lid 1 Landsverordening terbeschikkingstelling arbeidskrachten). Actualmente hopi trahado tin un salario hopi mas abou en comparacion cu su coleganan den mesun puesto di trabou.
Kiko pueblo di Aruba por hasi pa mehora e situacion actual?
E responsabilidad pa un pais cu ta respeta su leynan laboral no ta cay riba gobierno so. E tipo di abuso laboral ki mester wordo denuncia na Departamento di labor. Ta obligacion moral di e trahado y pueblo Arubano pa denuncia e tipo di abuso laboral. E trahado mester para pa su derechonan. Asina no solamente e ta yuda su mes, e ta yuda cu otro hendenan rond di dje y pa preveni cu esaki sosode den futuro. Un pais no ta bay abou door di hendenan ku ta kibra ley, pero door di hendenan ku ta wak otro kibra ley y no ta hasi nada. No bira complice di un Aruba cu no ta respeta su leynan laboral.
Plataforma pa Hobennan Professional (PHP) ta spera di por a informa e ciudadano nan un tiki mas riba e relacion entre un agencia di empleo, trahdo y e inlener. PHP tey tur diasabra na Cas di Partido AVP pa informa pueblo tocante tema nan manera esaki y hopi mas. Si bo persona ta desea di tin mas informacion tocante e tema di schorsing, por pasa libremente tur diasabra na Cas di Partido di 2PM – 4PM unda e miembronan di PHP lo ta cla pa duna asistencia.
