E enfoke principal di e directiva nobo ta pa reestablece principionan di “Good Governance” bek den Aruba Atletiek Bond. Ningun plan detaya no lo por wordo ehecuta debidamente si no tin principio y proceso adecuado di “Good Governance”. Esaki tabata evidente den e delaster directiva di AAC/Olympia cu nos ta ilustra tambe den nos splicacion.
Asamblea General
Den tur federacion, e organo mas halto ta e Asamblea General caminda cu e clubnan ta haya oportunidad pa vocifera nan opinion di e directiva actual y tambe bin cu idea y plan nobo. Den e Asamblea, cu nan votonan, e club ta dirigi y indica na e directiva con nan kier pa e futuro di e federacion continua. AAF statuut ta dicta cu cada aña directiva mester yama minimo 2 Asamblea General pa asina duna cuenta na e clubnan riba e trabou cu nan ta eherciendo. Den e delaster 5 añanan, E directiva di AAC/Olympia a yama un total di 2 asamblea solamente. E directiva nobo ta priminti pa cumpli cu por lo minimo e dos asambleanan pa aña pa asina tende hopi bon cla di e clubnan riba con nan ta haya e maneho y direccion di e directiva ta bayendo. Tambe pa asina e direccion di e deporte ta hopi mas na cas cerca e clubnan cu ta forma e federacion.
Financia
E responsabilidad grandi di maneha e placa cu e federacion ta haya pa inverti den e muchanan a wordo mal maneha pa aña door di e directiva di AAC/Olympia Track & Field. Awo a yega asina leu cu no ta ni entrega relato financiero mes mas y no ta laga e kascommissie controla anualmente con e fondonan di e deporte ta wordo maneha. Ainda no a haya niun relato di 2018,2019 ni 2020 di e tesorera di directiva. Ni comisarionan den directiva tin acceso of conocemento di e financia di AAF. E tesorera ta keda luna te hasta aña sin manda cobransa pa cierto club nan. Mas tristo ta pa bin haya sa cu e placa cu e clubnan ta paga pa huur stadion, no ta wordo paga na e instancia concerni. Esaki a traha un debe grandi durante e delaster añanan cu a yega un suma masalmente di 25.000 florin. E directiva nobo lo trece transparencia bek den e financia di AAF. E placa pa inverti den nos atletanan ta algo sagrado y esaki mester ta publico pa tur clubnan compronde con federacion ta manehando cu e fondonan aki. Tambe ta trahando caba riba un plan pa con pa baha e debe di stadion bek pa asina no risca e habilidad di nos atletanan pa uza e stadion y practica e deporte di atletismo.
Separacion di directiva y coach
Den e directiva di AAC/Olympia, e mesun persona cu ta presidente di federacion tambe tin e posicion di bondscoach. E persona ta haya mensualmente un cifra di mas cu 1000 florin y no ta bezig ta train ningun atleta. Di e tiki fondo cu atletismo ta haya, 12.000 florin di dje ta bay perdi cada aña pa paga e president/bondscoach aki. E directiva nobo lo tin un separacion duidelijk entre directiva y coach (Comision Tecnico). E directiva ta bezig cu maneho di e federacion- y coachnan ta bezig cu e parti tecnico di e deporte. Nos lo introduci tambe un bondscoach nobo cu aprobacion di e clubnan, cu si lo traha activamente pa yuda nos atletanan progresa riba e trayecto di termino largo.
Atletismo ta inclui Track & Field & tambe Road Running
Den e directiva di AAC/Olympia, atencion a wordo duna pa esunnan cu ta haciendo Track & Field y na mes momento ta neglisha nos atletanan cu ta practica Road Running. Na mes momento por mira cu Track & Field a mira un caida pisa den interes di e clubnan paso no tin suficiente evento adecuado of oportunidad pa e atletanan den e disciplinanan aki. E directiva nobo lo trece atencion na ambos parti di Atletiek, como tanto Track & Field como Road Running. Tambe lo traha pa revitalisa e interes bek den Track & Field pa asina e interes di e club- y atletanan por bolbe crece den e practica di e disciplinanan aki.
Sponsorships & fundraising
Pa ehecuta tur e plannan aki, e directiva nobo, cu bon organisacion, lo traha duro pa trece sponsorships bek den e federacion pa asina por funda tur e plannan pa mehora e deporte y duna oportunidad pa nos atletanan por practica e deporte na Aruba y den exterior. Door di mal maneho di e federacion, sponsorships den e ultimo añanan tabata hopi scars y asina hopi plannan ta keda na palabranan. E directiva nobo lo traha duro pa drecha bek e imagen di Atletiek Bond y asina trece sponsorships bek den e deporte aki.
Nos ta spera cu nos splicacion di e plan pa cambio ta duidelijk pa tur atleta, mayor y coach. E aliansa pa cambio ta cla pa trece e cambionan aki den nos federacion. Eleccion ta diamars awo, ban pe cambio, ta ora pa e atletanan ta central bek!
