Dialuna den oranan di atardi un transporte di CEA a bin busca e sospechoso Pieter Susebeek na Landsrecherche riba Vondellaan. Manera ya ta conoci, otro sospechosonan den caso ‘Avestruz’ manera Franklin F. Abath, Freddy Every y Leoncita Arends, Rebecca Richardson, Jeff Franken, Ninosca Nuñez, Gaby Werleman, Mary Hsing, Claudia Sevinger ya a recobra nan libertad. Unico sospechoso cu ainda ta encarcela pa nan interogacion ta Susebeek y Benny Sevinger.
Prome cu Susebeek a drenta den e transporte di CEA, el a bisa su famianan para pafo: “Final ta cerca.” A transport’e bek pa KIA dialuna atardi, caminda e lo permanece encarcela.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017.
