No ta pornada Hesus a splica e discipelnan e palabranan den Mateo 13 tocante e maishi y e yerba shimaron. Mateo 13: 37 Hesus ta bisa: Esun cu ta sembra e bon simia ta e Yiu di hende, y e cunucu ta e mundo, e bon simia ta e yiunan di reino, y e yerba shimaron ta e yiunan di e malvado. E enemigo cu a sembranan ta e diabel, y e cosecha ta e fin di mundo, y e cosechadonan ta e angelnan.
Tur esunnan cu tin wowo habri, bo wowo y sabi dicon maldad, y inmoralidad ta aumenta dia tras dia. Pa motibo di e simia di maldad sembra door di diabel den e mundo aki y cu hopi ta cay aden, nan no kier arepenti y entrega nan bida na Cristo Hesus pa bira un yiu di e reino di Dios.
Pero tene cuenta tambe cu e maishi y e yerba shimaron ta crece hunto, pasobra Hesus mes a bisa cu e enemigo a sembra den e cunucu, y e a bay (Mateo 13:25).
P’esey e palabra di Dios ta bisa cu na nan fruta bo ta reconoce nan, (Mateo 7:15-20) ora hende conoce e berdad di Dios, e ta haci tur locual ta posibel pa bay contra e boluntad di Dios door di apoya maldad y complace cu diabel sea pa su propio ego, placa, poder of posicion e ta demostra di ta shimaron.
Ora hende ta core pa responsabilidad, ta un señal tambe di shimaron. Pasobra e enemigo a sembra y a coy su caminda bay. Dios tene misericordia, ta tempo pa nos habri wowo.
Tene cuenta cu locual tin para skirbi den Daniel capitulo10:12: No tene miedo, pasobra for di e prome dia cu bo a pone bo curason, pa compronde esaki y humilia bo mes dilanti di bo Dios. Bo palabranan ta tendi, y mi a bin como contesta riba bo palabranan. Ma e prins di e reino di Persia tabata stroba mi 21 dia largo. Y mira Miguel un di e prensanan principal a bin yuda mi.
Aki nan nos tur mester cuminsa compronde cu maldad t’ey y forsa di scuridad t’ey pa stroba nos oracionnan y cu nos mester persevera den oracion, Nos mester haci oracion constantemente.
Ora Hesus tabata batisa den Jordan pa Juan Bautista, shelo a habri y el a mira Spirito di Dios baha manera un paloma,y keda riba dj’E. Y ata, un bos for di shelo, bisando esaki ta Mi Yiu stima den Kende Mi tin goso (Mateo 3:16).
E tentado a bin y a bis’e si Bo ta e yiu di Dios, ordena e piedranan pa nan bira pan. Ma Hesus a contesta y bisa cu hende no ta biba di pan so, ma di tur palabra cu sali for di boca di Dios.
Aki nan nos tin un prueba mas cu e enemigo no ta kier respeta y hasta e a purba di planta su mal simia den Hesus, door di presenta cu duda.
Pa culmina Pablo ta bolbe skirbi den 2 Timoteo 3:1-9 bisando asina aki: Ma sabi esaki, cu den e ultimo dianan, e temponan trabahoso lo bini. Y esey ta locual nos ta mirando, hende a perde respet pa Dios y su palabra, hende a bira odiado di locual ta bon.
Hende cu tin apariencia cu nan conoce Dios, ma cu ta nenga e berdad di Dios den nan bida.
Maldad ta wordo aplaudi y bondad ta critica. Persevera den oracion.
Sinceramente,
Pastoor Marcel Balootje.
