Diadomingo anochi a sosode un accidente rib’e camind’i Tamarijn. Aki ta caminda cu chauffeur di un auto marca Nissan modelo March color blanco, numera A-14821 a perde control, drenta mondi y ranca un palo di luz.
Ta riba e caminda cu ta bin for di Sero Pita pa Tamarijn. E chauffeur no a resulta herida, sinembargo daño material tabata basta. E palo di luz a kibra den dos parti. Ora a check sigur, a resulta cu ta trata di waya di cable y no di coriente.
Basta habitante a presenta na sitio p’asina mira con por a yuda e chauffeur. E auto practicamente no por move mas riba su propio forsa. Na yegada di polis, a topa cu e chauffeur su so den auto.
A cera un band’i caminda p’asina por atende cu e accidente aki libremente. Polis di trafico tambe a presenta p’asina por documenta e accidente aki. Na final un takelwagen a hiba e auto mirando e estado cu e auto a keda, e impacto tabata asina fuerte cu hasta e airbag a sali.
