Bon consenshi, tin mas balor cu oro, diamanta, placa, pasobra bon consenshi ta hiba hende dilanti di Dios.
Como persona bo por samina bo consenshi y wak na unda bo ta den bida, pasobra consenshi ta trata cu alma, curason y mente.
Ta bon pa mayornan lanta nan yui c’un bon consenshi, leu di rabia, odio, y mal deseo, pasobra ta esey ta locual e enemigo ta usa pa venena yiu di di hende awendia.
No ta pornada cu bijbell ta hala nos atencion pa lanta nos yuinan den e palabra, enseñansa y instruccion di Señor, ta pa evita locual nos ta mira diariamente , caminda hoben ta caba cu hoben.(Efesios 6:4)
Un mayor por bisa cu e no tin control di e consenshi di su yiu, pero e ta responsabel pa locual ta drenta den dje. Locual mucha, tende y mira ta drenta den nan curason, y ora abo como mayor kere e cos a caba, e cos ta keto bay den curason di e mucha y e mester di oracion y ayuno pa liberacion.
Salmo 16:7 ta bisa: Lo mi bendiciona Señor kende a dunami conseho, tambe mi curason ta instruimi te den oranan di anochi .
Un bon consenshi ta atrae conseho di Dios, un bon consenshi ta trece pas y trankilidad na curazon.
Un bon consenshi ta un bunitesa interno, cual ta briya den nos curazon, y ta intercepta maldad ora e kier acerca.
Un bon consenshi ta tene mal amigo lew, un bon consenshi por nota e diferencia entre locual ta falso of berdadero.
Un bon consenshi ta pura pa pordona, pa asina evita cu odio y amargura por domina, y asina evita cu diabel lo cohe bentaha den bida di nos yuinan.
Nos ta balora tur estudio, pasobra tur estudio ta nifica perseverancia, y dedicacion, pero cuanto mas nos tin di balora un bon consenshi?
Hopi biaha muchanan no kier comprende cu ora nan ta scucha y mira matamento y crueldad na tv of riba internet e cosnan ey ta keda pega den nan mente, y den un momento di desesperacion e por afecta e consenshi.
Ora mayor ta insulta otro y bringa constantemente dilanti di nan yiunan, e consenshi di e mucha ta corre peliger pasobra e tin di tuma parti pa uno, y rechasa e otro, aki nan nos ta mira con nos como mayor por afecta consenshi di nos yuinan.
Ta tristo pa bisa, tin biaha bo ta tende e mucha a sali su tata net den e cosnan negativo, esey ta nifica cu e forma di biba di su tata a afecta su mente, curason y awor ta domina su consenshi.
Ora nos ta bay haci oracion, prome cos cu nos tin di haci ta pidi Dios limpia nos consenshi di tur maldad.
Nos mester siña nos yuinan cu odio y vengansa no ta di Dios, y nos curazon no traha pa odio cu vengansa, sino pa amor.
Dios yuda nos tur pa lanta yuinan cu un bon consenshi.
